Подöн важас. Совхоз рöдмöдö чипанъясöс

[ A+ ] /[ A- ]


«Ленин туйöд» газет 1970 вося январ 13-öд лун

Совхоз рöдмöдö чипанъясöс
Ферма дорö воигöн на ылысянь кылан чипанъяслысь котсьöмсö да петукъяслысь горзöмсö. Абу и дивö, öд куим тысяча сайö юр, ставныслöн номсасян кад, корöны чöскыдджык сёян.
Мöд татшöм чипанъяс видзан фермасö районысь он аддзы. Сöмын «Усть-Куломскöй» совхозлöн Центральнöй отделениеын, важ традиция сертиыс, видзöны чипанъяссö специальнöй фермаын. Воддза фермаыс татшöм жö ыджыд да югыд вöлі, но öти гожöмö чардбисянь сотчис. Сотчис и джын чипаныс. А сэсся стрöитісны выльöс, ещö на ыджыдджыкöс.
Чипанъясыс дзик лым кодь еджыдöсь. Сöстöма видзö найöс фермаса заведующöй Екатерина Васильевна Зезегова. Сійö аслас Тамара нылыскöд пуктöны чипанъяс бöрся бур дöзьöр. Лунтыр асывсяньыс рытöдзыс вердöны да юкталöны, чукöртöны кольк. Кыдзи лун, сідзи и 1000 кольк.
— Тайö партияыс ставыс том чипанъяс, — висьталö Екатерина Васильевна,  кольöм арын став пöрысь чипансö сдайтім. Эз на ставныс велавны пуксьыны позъясö, сы вöсна колькъялöны кытчö веськалö: джоджас, мудöд вылас.
Медым кокньыдджык вöлі дöзьöритнысö, чипанъяссö торйöдöма нёль группа вылö. Фермалöн шöр юкöнас видзöны кöрым, а сэсянь веськалан став нёльнан группаас. Вердöны öтрубöн, идйöн, зöрöн, корсюрö и картупельöн.
Абу кокни уджавны чипан видзысьяслы. Медся нин омöль сiйö, кор став сёян-юансö лоö вöчны да кыскавны кукнясянь ас выланыс. Эм фермаыскöд орччöн ва сетан башня. Сiйö ваыс воö сöмын кукняöдзыс, а сэсся новлöны карнан ведраöн. А позьö тайö уджсö кокньöдны, вöлi кö чипанъяс оланiнас вöчöма ва баксö, кытчö воис ваыс веськыда башнясяньыс, а сэсянь лэдзöны васö воръясö.
Позьö механизируйтны и сёян разöдöмсö, вöлiс кö транспортёр. Кокньöдöма уджлысь сöмын öти процесс — öтруб гудралöм. Лöсьöдöма цемент гудралан пöрт, кодi лопастьяснас и сöльнитö öтрубсö ваöн да витаминъясöн.
Курöг ферма Усть-Куломса отделениелы сетö ыджыд доход.
Н.Иванов.

Комментарии:

Добавить комментарий

Свежий выпуск: за 6 мая