Водзтi, школаын велöдчигöн, ёна ёртасьлiм письмöясöн. Чайта да, тадз вöчлiсны унаöн. Квайтöд классын гижи Украинаö, письмö веськалiс Галина Бадюллы, пионеръяслöн дружинаса сöветöн юрнуöдысьлы. Öта-мöдлы письмöяс гижалiм сизим во. И со 1979-öд вося август 18-öд лун, Галя петö верöс сайö. Ме буретш помалi Эжваса училищеын велöдчöм, лои контролёрöн, мед уджавны СЛПК-ын. Медводдзаысь öтнам мöдöдчи ылi муö, Украиналöн Одесса обласьтö. Москваöдз лэби самолётöн, сэсянь Одессаöдз. Галина менö вочаалiс мича дзоридзьясöн, а киас менам снимок. Ме эг гöгöрво босьтны сылысь карточкасö. Галя уджалiс Ильичёвскын морскöй портын. Сэнi и тöдмасис Анатолий Роздобудькокöд, шань зонкöд, уджалiсны öтилаын. Куим лун олiм Ильичёвскын, сы бöрын поездöн мöдöдчим Одесса обласьтлöн Фрунзе районса Марьяновкаö. Кор вои Одессаö, Галина шуö, миян пö кык тöлысь эз зэрлы, а миян Комиын шлявгис быд лун. Воим Марьяновкаö, чеччим поездысь. Рытнас сэтшöма зэрмис, сувтсöн койис. Енмыслы пö аттьö, Коми муысь пö миянлы вайин зэр. Ме тшук эг бöрд, мися, кутас зэрны и танi? Но мöд луннас мичаммис нин.

 Кутiсны дасьтысьны кöлысь кежлö. Ворсны пö кутас духöвöй оркестр. 300 гöсьтлы лöсьöдiсны лэбув. Вот и интереснö вöлi! А козинъяссö сеталiсны сöмын рытнас. Татшöм, тыдалö, налöн öбычайыс. Быдöнöс чолöмавны петкöдлiсны торйöн.

 А мöд луннас гажöдчим водзö. Галиналöн кык чой вöлiсны нин верöс сайынöсь, гижсис и Галина, да Дмитрий батьыс да Екатерина мамыс лоисны быттьö жöник да невестаöн. Пасьтöдiсны найöс кыдзи колö, да куим зять пуксьöдiсны мичмöдöм телегаö, гуляйтöдiсны сикт кузя. Нöбасьысь суседкаыс сэтшöма йöктiс, мый мöд луннас чужтiс кагаöс.

 Свадьбаöдзыс куим лун эг видлi чай. Сэнi юöны сöмын компот да сок. И ме войнас висьталi Галялы, меным, мися, сэтшöма колö чай. Войнас пузьöдiсны ва, заваритны сюрис чай. Галялöн мамыс Казахстанысь да корсюрö веськöдö жö, вöлöм, горшсö чайнад. Юи да быттьö ловзи. Сы бöрын мекöд быд лун кутiсны юны чай.
Олi, гöсьтитi Ильичёвскад сентябрöдз на. Ёна вöлi шуöны, кольччы пö татчö, мися, ог, гортад век медся лöсьыд. Сэки ме олi на Эжваын. Сентябрын пыри уджавны СЛПК-ö.

 Украинаса нывъёрткöд аддзысьлiм унаысь на. На дорö ветлi аслам нывъёрткöд, чойкöд. Галина да Анатолий волiсны Комиö, ме нывъёртъяскöд вочаалiм Сыктывкарын, узим Эжваын, а сэсся АН-2 самолётöн лэбим Помöсдiнöдз. Бöрти гозъялöн чужис кык челядь.

 Да, колис уна кад, но век сюрö мый казьтывны.
2014-öд воын кöсйим паныдасьлыны. Уна во кольöм бöрын бара мöвпыштi ветлыны. Сэки апрель 12-öд лунö Галиналöн вöлi юбилей, тырис 55 арöс. Но сэнi олöм вежсис-гудыртчис, воштiм öта-мöднымöс. Нинöм ог тöд, кыдз-мый олöны. Бара матыстчö апрель 12-öд лун. Тшöкыда бур сьöлöма гозъя усьлöны дум вылö. Ме сэки вöлi Уляшева на. Дзик окота гижлыны «Жди меня» передачаö, корсьны Украинаса бур ёртъясöс.

 Мария Дёмина.

Гижысьлöн снимок вылын: Кöлысь ворсiгöн. 1979 во.