Бильярд — тайö абу сöмын спорт, тайö и сьöлöм вылö воана да вежöра ворсöм, кодi сöвмöдö мортлысь пельклун, писькöса олöм да тактическöя мöвпалöм. Бильярдöн ворсiгöн йöз сёрнитöны öта-мöдкöд, радлöны, шойччöны. Турунвиж дöраöн вевттьöм мича пызан дорын тшöкыда чукöртчылöны айловъяс да зонъяс. Миян районын бильярдысь ворсöны уна культура керкаын — Донын, Дiасёръяын, Пузлаын, Вöльдiнын, Кебанъёльын, Тимшерын, Носимын да Югыдъягын.

 Декабрь 3-öд лунö Кебанъёльса культура керкаын мунiс бильярдысь ворсöм, татчöс айловъяс ордйысисны донсаяскöд. Ставнас ворсiс дас морт, быд командаысь петкöдчисны витан. Пасъям, мый Донын бильярдысь ворсöны сизим во нин, а Кебанъёльö выль пызан вайисны сöмын таво гожöмын на. Та вылö видзöдтöг кебанъёльсаяс, ёнджыка нин томулов, ворсöны дзик быд лун. Зэв бур, кор эм позянлун та могысь паныдасьлыны бокиысь воöм гöсьтъяскöд. Бильярдын эм кык медшöр ворсан сикас — роч да американка. Районын медсясö кутчысьö роч сикас. Та вöсна турнирын ворсiсны тшöтш сыысь. Донсаяс вöлiны вынаджыкöн да вермисны. Öти партия ворсiсны и американкаысь. Танi ёнджыкöн лоины кебанъёльсаяс. Öта-мöдкöд тöдмасьöм да ворсöм бöрын ставныс пуксисны пызан сайö чöскыд пирöгъясöн юны чай.

Выль воöдз тайö ворсöм кузяыс мунасны турниръяс Донса да Вöльдiнса социокультурнöй шöринъясын. Вöльдiнын выль бильярд ньöбисны таво «Зарава» асвеськöдлан котырöн балаöн петкöдчöмöн шедöдöм сьöм вылö. Кутам лача, мый сикт-посёлокъясын бильярдысь ворсысьяс кутасны ёртасьны, волыны öта-мöд дораныс да нуöдны турниръяс.

Артур Гарнов.

Снимокъяс гижысьлöн.