Став странаным мыйöнкö да мыйöнкö отсалö торъя военнöй операцияö пырöдчысьяслы. Ручсаяс оз жö весь пукавны. Со бара на Кулöмдiнö мöдöдöм вылö лöсьöдiм посылкаяс, кытчö пукталiм носки-перчатки, бурдöдчанторъяс, юмовторъяс, тушёнка да сгущёнка, кофе, чай да уна мукöдтор. Сиктсаяс ваялiсны сельсöветö да библиотекаö, а сэсся ветеранъяс котырö пырысьяс чукöртчим, ставсö бура юклiм да лöдiм торъя кöрöбъясö. Кыим кöкъямыс метра кузя да куим метра судта квайт саймовтчан сетка, шлем вылö пысаланъяс, браслетъяс. Бöръясö кыны волiсны Марина Валерьевна Пименовалöн 6–öд да Ирина Алексеевна Поповалöн 7–öд классъясыс. Кысьынысö велöдiс культура керкаса уджалысь Любовь Ремовна Попова.

Культура керкаöн веськöдлысь Надежда Михайловна Трегубова кысьысьяслы локтiгкежланыс вундалiс гöрддзымысь ленточкаяс, мед сöмын кыны сетка да шлем вылö пысаланъяс. Кысьынысö волывлiсны унаöн, кöкъямыс метраа сеткаыд кык лунöн вöлi дась нин. Сеткалы панассö ньöбим асьным, а кыан материалсö тайö пöрйö сетiсны Кулöмдiнысь, уна вöлi воöма карысь социальнöй отсöг сетан шöринö да.

Окота пасйыны найöс, кодъяс культура керкаö волывлöны быд лун, мед отсасьны, а тайöн матыстны Победа лун. Тайö – М.Д. да А.М.Юдинаяс, А.И., Л.Р., да Г.В.Поповаяс, Л.И.да М.И.Кирушеваяс, О.Д. да А.Н.Зезеговаяс, К.Г. да Е.Д. Есеваяс, М.В., С.А. да Л.А.Расоваяс, А.Т. да К.А. Ульныроваяс, Г.Н. да К.А.Порошкинаяс, А.И.Шахова, Е.Е. Жаровских, А.И.Адамова, Н.И. Мишарина, М.А.Нестерова, Н.М. Трегубова, М.Н.Лобанова. Галина Владимировна Попова волывлiс Владислав внукыскöд, кодi велöдчö 4–öд классын. Челядь, кодъяс пыравлiсны культура керкаö миян кысигöн, тшöтш, кöть неуна, но отсасисны, тайö Родион Порошкин, Егор Попов, Кирилл Лютоев.

«Давид» лавка кутысь Любовь Ивановна Игушева да «Улыбкаын» уджалысьяс Галина Владимировна да Наталья Михайловна Поповаяс ыджыд пай пуктiсны гуманитарнöй отсöг чукöртiгöн. Став ветеран-волонтёрыслы да сиктсаяслы муöдз копыр да ыджыд аттьö.
Екатерина Ульнырова.
Снимокъяс гижысьлöн.