Меставывса общественнöй веськöдлöм пансьö водзмöстчысь йöзсянь, кодъяс вевъялöны сюртчыны быд уджö, налы абу веськодь кытшалысь олöмыс, пыр мöвпалöны сiйöс кыдзкö бурмöдны, öдйö öзйöны да кутчысьöны олöмö пöртны думыштöмторсö. Кор сиктын эмöсь сэтшöм йöзыс, сiйö олö да кыпалö.

Ангелина Ивановна Ковальчук, Югыдъяг посёлокса культура керкаысь художествоа веськöдлысь – пыр уджын: сылöн челядьлöн творчество котыръяс, «Югыдлань» йöзкостса ансамбль, накöд пыр дасьтысьöны концертъяс кежлö, гажöдны петалöны йöз водзö посёлокын, районын и республикаын, таысь кындзи сылöн нöшта и семья, керка, овмöс. Аслас уджысь öтдор Ангелина Ивановна топыд йитöд кутö посёлокса администрациякöд, уна во вöлі овмöдчöминса сöветын депутатöн. Уджас вермöмъясысь Ангелина Ивановнаöс унаысь пасйылісны республикаса культура, туризм да архив удж министерстволöн да районса администрациялöн почёт грамотаясöн. Югыдъягын сійöс тöдöны, кыдзи кывкутысь, тöлка, велöдчöм мортöс, ыджыд мывкыда аньöс, бур мамöс да прöстö мортöс, коді ёна радейтö ассьыс посёлоксö. Кор Кулöмдін районын заводитісны артмыны асвеськöдлан котыръяс, районса да посёлокса юралысьяс вöзйисны Югыдъягын тайö уджсö нуöдны буретш Ангелина Ивановналы.

– Ми кывлім Тимшерса, Помöсдінса да Кулöмдінса асвеськöдлан котыръяслöн удж йылысь, – висьталiс сiйö. – Найö асланыс сиктъяслы вöчисны уна буртор. Миянлы окота жö вöлі кыдзкö мичмöдны, сöвмöдны посёлокнымöс, вöчны сійöс челядьлы и верстьöлы бурджыкöн. Сьöлöм вылын сьöкыд вöлi, кор шулiсны, мый миян тані лёк, да муналöны татысь. Тöданныд, оз местаыс мичмöд морттö, и век бур сэні, кöні ми абуöсь. А видзны ассьыд, вочасöн чукöртны, лöсьöдны, бурмöдны – тайö сьöкыд, но зэв колана. Государство, фондъяс сетöны позянлунъяс. Сöмын колö кад, ки, вын. Балатö мöвпыштны этша на, колö на чукöртны уна документ, артавны сьöм, подулавны грант сетысьлы тэнад мöвплысь коланлунсö, а сэсся видзöдны удж вöчöм бöрся, висьтасьны. Ме дыр мöвпалi, майшаси. Но меным отсалiсны уджъёртъяс, асвеськöдлан котырö пырысьяс. Босьтчынысö вöлі сьöкыд, а сэсся вочасöн пырöдчим уджас, зiлям, гижам. А отсасьöны меным миян секретарь да дизайнер Ирина Логинова, менам Ксения Дубицкая ныв, а сідзжö республикаса территориальнöй общественнöй асвеськöдлан котыръяслöн ассоциация.

Öні «Югыдъяг» асвеськöдлан котырлысь уджсö веськöдöма меставывса мутасъяс, культура олöм сöвмöдöм, посёлоксö кыпыдджыкöн вöчöм вылö.

Балаяс олöмö пöртöм йылысь паськыдджыка лыддьöй декабр 12-öд лунся газетысь 8-9–öд лист бокъяс вылысь.
Ксения Дубицкая.