Октябр 29 лун — автомобильнöй транспорт вылын уджалысьяслöн лун

[ A+ ] /[ A- ]

 И водитель, и механик

 — Бöръя воясын «Дзоньвидзалун» национальнöй бала серти зэв бура могмöдiсны выль техникаöн. 2021-öд воын вичмис 12, 2022-öдын — 6, таво — 7 машина. Тöдчымöн лоис кокни. Воддза машинаяс вöлiны важöсь, запчасьтöн эськö могмöдлiсны, дзоньтавлiм, но ёна ветлöмнад да, öдйö жö и киссьылiсны, — сёрнитiс шöр бурдöдчанiнысь механик Юрий Николаевич Минаев.

Ачыс Аныбысь. Чужанiнын школа помалöм бöрын мунiс велöдчыны
34 номера Сыктывкарса лицейö. Лоис техник-механикöн. Гöтрасис,
да олыштiсны карын, но кыскис гортö. Тöвнас зiлис асшöр уджалысь дорын, тулыс да арын вуджöдчис Аныб сайын Эжва ю вомöн катерöн, вöлi капитанлы отсасьысьöн. 2013-öд воын локтiсны Кулöмдiнö.
Юрий Николаевич пырис шöр бурдöдчанiнö водительöн, висьысьясöс новлöдлiс юркарса бурдöдчанiнъясö. Водительяслöн отпускалiгöн пуксьылiс и «Тэрыб отсöг сетан» юкöнлöн машина вылö. Бурдöдчанiнсянь ыстылiсны ДОСААФ-лöн Сыктывкарса юкöнö велöдчыны вöдитчыны сиренаöн. Машина петалiс эз сöмын Кулöмдiнö да матiгöгöрса сикт-грездъясö, но и ылöджык. Колiс бура тöдны туй юкöнъяс, уличаяс, пыранiн-кежанiнъяс, кытi öдйöджык воöдчыны ёна нёрпалысь либö кага дорö.

— Сэки навигаторъяс эз на вöвны, вöдитчи воддза водительыслöн картаöн. Да и фельдшеръясыд бура тöдiсны туйкежанiнъястö,
колiгöн висьталiсны. Öтчыд мунан, мöдысьсö тöдан нин. Талун фельдшеръяслöн планшет, сэнi ставсö петкöдлöма-пасйöма. 2021-öд во панассянь индiсны гаражын начальникöн, но пуксьыла жö руль саяд, «Лада Гранта» машинаöн врачьясöс новлöдла сикт-посёлокъясö, лэччывла карö, — висьталiс механик.

Юрий Николаевич кывкутö шöр бурдöдчанiнлöн сойборд улö пырысь район пасьта бурдöдчанiнъясысь машинаяс вöсна. Водительяс пö ыджыд сямаöсь, кывкутысьöсь. Колiгöн асьныс дзоньталöны техниканысö, колö кö запчасьт, шыöдчöны механик дорö. Смена бöрын бытьысь видзöдласны гöгöрбок, мед ставыс вöлi лючки-бур, да мöд водительыс падмöгтöд петiс туйö висьысьяс дорö.

 Марина Дадашова.
Снимок гижысьлöн.

Комментарии:

Добавить комментарий

Свежий выпуск: 1 марта

https://www.gosuslugi.ru/help/faq/mobile_election/2100910

Осторожно — мошенники!