Коронавируслы паныд водзсасьöм могысь уджалан котыръяс кад кежлö дугöдчисны уджысь. Тайö эз инмы видз-му овмöс юкöнлы. Зiльöны лун и вой, вердöны миянöс. Сьöкыд кадö бергöдчанног йылысь висьталiс видз-му овмöс юкöнöн веськöдлысь Анастасия Ревокатовна Ярова.

• Мытшöдъяс содiсны. Öти кö, абу тöдса кутшöмöн лоö майыс, вермам-ö скöтöс петкöдны йирсьöдны да видзтöмöн вердам турунöн. Нöшта пыр содö кос прессуйтöм кöрым вылö дон.
  Мöд кö, мöсъяслöн вайсьöмöн да гырысь скöт юр лыд содöмöн «Помöсдiн» кооперативлöн, Л.Ю.Епов, Е.Е. Тарабукина да Т.А.Попова крестьянин овмöс кутысьяслöн оз тырмы местаыс том мöсъяслы.
  Коймöд кö, содтöд рöскод лоис маскаяс, чуня кепысьяс да висьмöдан микроб бырöдан сорасъяс ньöбöмöн.
  Нёльöд кö, чинiс вöлöга иналöм. Оз уджавны йöла вöлöга босьтысьяс: садъяс, школаяс. Сыктывкарын шойччан лунъясö оз котыртчыв ярмарка, омöля ньöбасьöны и йöз.
• Бур, мый Кулöмдiнын быд пекничаö уджалö видз-му овмöс ярмарка. Кыдз сэнi котыртöма вузасьöм?
• Ярмарка нуöдан жыръяссö пыр кутöны сöстöма. Эмöсь торъя ки мыськаланторъяс, вузасьысьяс уджалöны маскаöн да чуня кепысьöн, вузасьысьяс да ньöбасьысьяс кутчысьöны öта-мöдысь урчитöм костö. Пыранiнас торъя морт лэдзö сöмын маскаа кык-куим ньöбасьысьöс. Буретш ярмарка вузасьöмöн видз-му овмöсъяс иналöны вöлöгасö да босьтöны мында кö сьöм.
• Сьöкыд вöлi кöрымöн «Пожöг» кооперативын. Вежсис-ö серпасыс?
• Кооперативыс Сыктывкарысь ньöбис 80 тонна турун да сенаж, Керчомъяысь — 4 тонна турун. Асланыс видзасын эм 14 тонна сенаж, да тырмас йирсьыны петтöдз. Апрель да май кежлö ньöбисны нöшта 10 тонна вына кöрым. Эска, танi оз чинтыны скöт юр да йöв лысьтöм.
  Сёрнитiс Марина Дадашова.