Кык вежонся каникулъяс бöрын районса школаясын бара велöдöны дистанционнöя. Тадзи тöдöмлун босьтöны нин март 16-öд лунсянь.
Сы кежлö уна школаяс вöлiны дасьöсь, бöръя воясын найö пырöдчисны «Якласс», «РЭШ» да «Moobl» велöдан подув вылын интернет пыр велöданногö. Таво куим школа видлiсны велöдны «Учи.ру» серти, «Мобильное электронное образование» серти 18 школаысь уджаланног видлiсны 119 велöдысь да 1-11 классъясысь 639 велöдчысь. Водзмöстчисны велöдысьяс да ылыстчöмöн тöдöмлун сетiгöн пырöдчисны велöдан министерствоöн котыртöм курсъясö, тöдмасисны татшöм велöданногöн мукöд школаяслысь.
Кыдз талун гортын пукалöмöн челядь босьтöны тöдöмлун? Быд велöдчысьлы школаса электроннöй журналö гижöны гортса удж. Юöртöны и мукöдног. Юалöмъясысь тыдовтчис, мый став бать-мамысь да велöдчысьысь 90 процентыслы лöсялö татшöм велöданногыс да социальнöй сетьяс да мессенджер пыр йитöд кутöмыс. Тайö туйвизьясын быд предмет кузя паськыда тöдмöдöны кытысь корсьны, босьтны содтöд, гöгöрвоöдöны велöдан книгаяс серти, висьталöны кыдзи уджавны ичöт öда интетернетöн.
Сикт-посёлокъясын абу öткодь öда интернет, гаджет абу быд велöдысьлöн да велöдчысьлöн, да ставсö тöд вылö босьтöмöн, быд школалöн аслас велöданног. Кык сиктысь уна бать-мамлöн абу позянлун вöдитчыны интернетöн. Танi уджалöны сотöвöй телефон отсöгöн.
Вежласьтöм бур öда интернет вит школаын. Сiйö кö абу велöдчысьлöн гортас, бöрйöны мöд велöдчанног да уджалöны накöд торйöн.
16 школаын интернетлöн абу пыр бур öда йитöд.
Ичöт классъясын этшаджык тшöктöны вöдитчыны интернетöн. Налöн бать-мамыс абу пыр гортаныс да оз вермыны аддзыны, збыль-ö быдтасыс велöдчöм могысь пырö интернетö.
Урокъяс мунöны урчитöм кадö да сöмын 30 минут. Велöдöны кык нога. Öтиясöс, кодъяслöн эм интернет, да мöдъясöс, кодъяслöн сiйö абу. Видеоконференция отсöгöн нуöдöны и видеоурокъяс да педсоветъяс. Югыдъяг, Ягкöдж, Кулöмдiн да Дереваннöйса школаяс уджалысьяскöд да велöдчысьяскö йитчöны Skype, Zoom, MyOwnConferenc пыр.
Велöдысьяс шмонитöны нин, мый вуджисны суткичöжся уджö. Челядь да бать-мам гортса уджъяс либö юалöмъяс ыстöны любöй кадö. Нöшта интернет пыр велöдчöм кузя юалöмъясöн позьö звöнитны асланыс школаса либö велöдан управлениелöн телепонъясö.
«ВКонтакте»-ын велöдан управление пыр йöзöдö выльторъяс, велöдысьяслы да бать-мамлы юöръяс, тöдмöдöны и кытысь позьö корсьны содтöд аслыныс экзаменъяс кежлö дасьтысигöн.
Школаяс дистанционнöя велöдчасны апрель 30-öд лунöдз. Кыдзи уджавны водзö петкöдлас кадыс.
Велöдан управление.