Ыджыд тöжда

— 2021-öд вося ноябрсянь Белоборскын старöстаöн зiльö Георгий Деонисьевич Оларь, — висьталiс «Югыдъяг» овмöдчöминлöн администрацияöн веськöдлысьöс вежысь Тамара Андреевна Варварук.
— Зэв кывкутысь морт. Уна во сэнi олiгöн бура тöдö посёлокса олöмсö да сэтчöс йöзöс. Олö налöн тöждъясöн. Посёлоксаяс сы вылö лача кутöмöн пыр шыöдчöны сы дорö асланыс могъясöн ли майшöгъясöн. Мöдыс зiльö отсавны позянлунъяс серти, колiгöн шыöдчылö миян администрацияö, медым öтув разьны мытшöдсö. Öнi на шыöдчылiс корöмöн, медым шыльöдны Югыдъягсянь Белоборскö мунан туй. Та кузя йитчылi «Трударенда» котыркöд, кодi буретш дöзьöритö ветланiн бöрсяыс, медым лöсьöдыштiс. Белоборск миянсянь ылын, быд мытшöд вöсна сэтчöдз ветлыны он вермы, со и йитöдсö пыр кутам старöстакöд, юасям, кыдзи олöны сэнi.

Георгий Деонисьевич бура дыр уджавлiс леспромхозын чокеруйтчысьöн да увйысьысьöн. Пенсия вылас петöм бöрын зiлис ломтысянiнын. Кор вöзйисны лоны старöстаöн, эз бöрыньт, кöсйысис, медым пö посёлокыслы мыйкö буртор кöть вöчны. Да и йöзыс сувтiсны сы дор.

— Тöжд-майшöгыс посёлокын пыр эм, — эскöдiс старöста. — На йылысь сёрнитлам сходъяс либö собраниеяс вылын, вонас кыкысь-куимысьтö чукöртчылам быть. Корлам сэтчö тшöтш и кывкутысь йöзöс, весиг районса администрацияысь, медым öтув разьны паныдасьлысь тырмытöмторъяс. Йöзыс ёна майшасисны телефона лёк йитöд вöсна, дыр кадöн, кыдз шуласны, йиыс вöрзис, таво вöлисти вöчисны. Кöть олам, позьö шуны, вöрын, но танi сьöкыда бергöдчöны пескöн. Та кузя тшöкыда шыöдчылöны йöзыс, сёрнитча Югыдъягса асшöр уджалысьяскöд, да вайöны сэсянь. Матыстчылöны и мукöд майшöгъясöн. Быдöн кузя медводз сёрнита Югыдъягса юралыськöд, öтув корсям позянлунъяссö, кыдзи бырöдны мытшöдъяссö. Колiгöн йитчыла и районса администрациякöд. Бöръясьыс шыöдчылi клубысь шоныд мунан визь вежöм кузя.

Старöсталöн могыс уна: колö видзöдны посёлокын сöстöмлун, йöзöс биöн да ваöн бура могмöдöм бöрся, мед бура дöзьöритiсны да ас кадö весалiсны туйяс да с.в. Интернетын лöсьöдiс «Белоборск» сообщество, кöнi йöзсö тöдмöдö посёлокса выльторъясöн, культура юкöнын нуöданторъясöн, администрацияöн сетöм юöръясöн, чолöмалö гöгрöс чужан лун пасйысьясöс. Топыд да бур йитöд кутö став олысьыскöд. Кужö ышöдны найöс öтувъя уджö. Эмöсь сылöн отсасьысьяс, кодъяс öдйö кыпалöны быд уджö, котыртöны сiйö жö субöтникъяс. Тайö —
М.А.Пономарёва, К.Н.Кузьмин, С.И.Гришель да школаын на велöдчысь Артём Полищук. Торйöн нин бурöн пасйис да аттьöалiс Владимир Большаковöс, кодi кольöм воын да таво аслас техникаöн кодйысис да отсалiс йöзлы öтувъя юкмöссянь вайöдны гортöдзныс ва визь. Отсасис сылы А.И.Абдулаев.

Старöстаалöм — öтувъя, зэв кывкутана удж, сы вöсна Г.Д.Оларь сы дорö матыстчö зэв кывкутöмöн жö, и быд мог вайöдö помöдз, öд гöгöрвоö, мый сылöн зiльöм сайын посёлоксаяслöн тыр-быр олöм.

 Галина Нестерова.
Снимок Георгий Оларьлöн.