Лöнь олöм кутысьяс

Бöръя воясын томмö участокъясса уполномоченнöйяслöн уджалан котырыс, локтöны оз сöмын зонъяс, но и нывъяс.
Кольöм вося июльсянь Дон вожын лöнь олöм вöсна тöждысьö Елена Михайловна Леушина. Мукöд уполномоченнöйяслöн отпускалiгöн нöшта уджалiс Кебанъёльын, кытчö пырöны Озъяг, Куж да Ыджыд Куж, Ульяна, тшöтш и Кулöмдiнын, Ручын да Дереваннöйын.
— Быдмигöн ёнджыкасö ворслi зонкаяскöд. Вöлi зэв визулöн, збойöн, веськыдöн. Михаил Николаевич батьöй на шулiс, тэныд пö колö мунны велöдчыны милициялöн школаö, да и аслым вöлi окота. Но сiйöс тупкисны, да Кужса школа помалöм бöрын пыри Сыктывкарса индустриальнöй техникумö. Кöсйи эськö босьтны бухгалтерлысь специальносьт, но торйöнсö эз вöв, велöдчи серпасасьысь-бухгалтерö. Водзö Микуньын велöдчи проводникö, поездöн ветлi эг сöмын республика, но и Россия пасьта. Быдсяма йöзöс аддзылi, и колiс кужны сёрнитны быдöнкöд, гöгöрвоны найöс, коркö да лöньöдны кодöскö, сёрнитны чорыдджыка. Бергöдчи ас районö да уджысь орöдчывтöг водзö велöдчи Вяткаса госуниверситетын юристö, позьö шуны пуктi подув полицияын уджалöмлы, — сёрнитiс Елена Михайловна.
Пытшкöсса делöяс министерстволöн районса юкöнын 2020-öд вося декабрсянь. Медводз стажируйтчис, велöдчис министерство бердын уджалысьясöс дасьтан шöринын, вöлi Кебанъёль участокса уполномоченнöй Алексей Викторович Аверьяновлы отсасьысьöн. Буретш сiйö и туйдiс-велöдiс кывкутана уджö босьтчысь нылöс. Юристлысь диплом босьтöмöн Елена Михайловналы сетiсны Дон овмöдчöмин. Могмöдiсны машинаöн. Администрацияас эм торъя жыр, компьютер да сы дорö коланаторъяс. Сиктсаяс вочаалiсны зэв бура, накöд тöдмасигöн да аддзысьлiгöн олöма аньяс унаысь шулiсны: «Кытчö барай ныртö сюйин, нылукöй? Абу эськö тайö тэныдлы кодь уджыс да». Дон кындзи ветлö Шöръягö да Джеджимö. Ыджыд тöдчанлун сетö томуловлы, сёрнитöмöн да öлöдöмöн видзö лёкö сетчöмысь. Туйö петалö и öлöдан тэчасноглöн службакöд, кытчö пырöны велöдан, бурдöдан, семьялы да челядьлы отсöг сетан, опека юкöнъяс, ставöн, кодъяслöн уджыс кодаркö боксянь йитчöма челядькöд. Видзöдö и, мед вöралысьяс колана ногöн видзисны öружие. Елена Михайловна сёрнитö и сиктса сход дырйи. Быд пöрйö бытьысь висьталö телефон да интернет пыр быдногыс ылöдчысьяс йылысь, корö, мед эз эскыны налы.
— Шöръягса школаын урокъяс бöрын нывкаясöс да зонкаясöс шымыртöма быдсикас кружокöн да секцияöн, Джеджимса музейын пыр юргöны челядьлöн гöлöсъяс. Пуö олöмыс Донса социокультурнöй шöринын. И тайö зэв бур. Менам участокын видзöдлас улын öти морт, кодлы оз позь мунны районысь, оз позь ветлыны гажъяс вылö да уна йöзаинъясö, бытьысь колö лоны гортас 22-сянь квайт час асылöдз. Олö лöня, кор ог лок, век уджалö, звöнита да, век босьтö и телефонсö. Аттьöала ыджыд сяма участокса уполномоченнöйясöс, общественнöй пöрадок видзöм кузя полицияса начальникöс вежысь Дмитрий Алексеевич Кирушевöс туйдöмысь, отсалöмысь, — пасйис Елена Михайловна.
— Нимкодь, мый миян котырö локтöны томъяс. Найö öдйö велалöны, уджалöны кывкутöмöн. Помöсдiн вожын ставныс томöсь. Никита Николаевич Игнатов кыпалiс старшöй участкöвöй уполномоченнöйöдз нин. Ошка и Пожöгысь Александр Валерьевич Мартюшевöс. Нывъяс локтöны, тшöтш бур. Найö кадöн оз артасьны, зэв жö кывкутысьöсь. Югыдъягын медся дыр, 35 во, уджалiс Виктория Даниловна Генке. Миянсянь удж кузя кыпалiс Светлана Викторовна Панюкова, кодi веськöдлö туясьысьяслöн юкöнöн. Евгения Анатольевна Логинова стажируйтчис миян дорын, öнi дознание юкöнын. Участкöвöй уполномоченнöйяслöн юкöнöн веськöдлiс Виктория Дмитриевна Ракина. Участокса уполномоченнöйясыд, рочöн кö, универсальнöйöсь, вермöны вöчны полициялöн став юкöнлысь уджсö: и туясьысьлысь, и дознавательлысь, и оперуполномоченнöйлысь да мукöдлысь. Райадминистрация отсöгöн бурмöны уджаланiнъяс. Талун эштöданвыйын Помöсдiнын жыр, Югыдъягын, урчитiсны дзоньтавны Кулöмдiнын, Немдiнын да Тимшерын. Кебанъёльын выльмöдiсны да лöсялö öнiя корöмъяслы. Талун сэнi тшöтш том морт, Василий Александрович Кочанов патрульнопостöвöй службаысь вуджис миян дорö. Участкöвöй уполномоченнöйяслöн служба котыртчöмсянь 100 во тырöмкöд йитöдын пöся чолöмала ставнысö, öнiя уджалысьясöс и ветеранъясöс, сиа ён дзоньвидзалун, мед семьяаныс вöлi лада олöм, сэки и удж вылын лоас ставыс бур, — кывкöртiс пытшкöсса делöяс министерстволöн районса юкöнысь участокса уполномоченнöй да тыр арлыдтöмъяслöн юкöнöн веськöдлысь Борис Владимирович Зезегов.

Марина Дадашова.
Снимок гижысьлöн.