Ыджыд тыш век кежлö коляс йöз сьöлöмын медся сьöкыд, медся гажтöм да шуштöм кадöн. Тшыг нисьö пöт челядь, кöмтöм-пасьтöм верстьö, узьлытöм салдатъяс – тайö ставыс вöлi миян Чужан муын. Эз вöв ни öти котыр, кытысь челядь да гöтыр эз колльöдны фронт вылö мужичöйясöс. Миян семья тшöтш тöдмалiс тайö шогсö, нуис аслас сьöлöм пырыс.

Менам Михаил Иванович Напалков пöрысь пöльöй колис чужан Парч сиктсö 194–öд воын. Войнаöдз сiйö поздысис, гöтрасис да быдтiс квайт челядьöс. Война заводитчигöн сылы тырис 36 арöс, овны да овны. Но Выль во водзын котырö воис шог юöр – повестка. Олöмыс эз нин ло важкодьöн. Гöтырыс, Анна Матвеевна Напалкова, бöрдiс, но пыр чайтiс, мый воас радейтана мортыс ловъяöн бöр.

Военнöй служба заводитчис Ленинградса фронт вылын, 219–öд стрелковöй полкын, 11–öд стрелковöй дивизияын. Сулалiс кöдзыд тöв, пуляяскöд öттшöтш пель весьтын шутьлялiс чизыр бушков, окопъясын йизьöм му сöмын кынтiс. Дорйысьысьяслöн нинöм эз вöв: ни сёянюан, ни пищаль да гранатаяс. Но миян йöзöс сьöкыд повзьöдны таöн, найö мунiсны пыр водзö и водзö, пасьвартiсны лёк фашистъясöс. Ставнысö öтувтiс öти мог – вермыны!

Менам пöль колис ассьыс дженьыд, но сэтшöм колана туй тайö вермöм дорас мунöмын. 1942–öд вося тöв шöр тöлысь 29–öд лунö сiйö пуктiс юрсö Чужан му дорйöм вöсна. Гöтырыс тöдмалiс тайö шог юöрсö сöмын куим тöлысь мысти. Сьöкыд думыштны, кыдзи сiйö вермис босьтны асьсö киас да лэптыны «кок вылö» став челядьсö. Войнабöрся кадö Анна Матвеевналы отсасисны став сиктнас, öд тайö шоглуныс вöлi эз сöмын сылöн, но и став олысьлöн. Сьöкыд кад дырйи йöз топöдчöны, йитчöны да отсасьöны öта-мöдлы.
Менам пöльлöн олöмыс колис эз прöста. Сiйö сетiс олöмсö ас котыр вöсна, ас сикт вöсна, ас Чужан му вöсна!
Татьяна Напалкова.
Немдiнса школа, 10 класс.