Скöрöдумысь Владислав Сергеевич Пашнинлы мойвиис служитны сынöдса военнöй вынъяс войскаын. Веськалiс Ленинград обласьтö, противоэлектроннöй тыш нуöдан батальонö. Видзисны сынöдса гöгöртас.
– Миянöс велöдiсны аддзыныказявны вöрöглысь матыстчысь самолёт либö пилоттöг лэбалысь аппарат. Сувтöдалiм антеннаяс, йитiм кабельясöн да видзим найöс. И кор локтö самолётыс либö дроныс, миян антеннаяс торкöны налöн приборъяслысь уджалöм, сэки ылiсянь оз нин вермыны веськöдлыны наöн, петöны стройысь, жугалöны да усьöны, оз воны урчитöминöдз, – бергöдчылiс служитан кадас Владислав Пашнин.

А армия кежлö вöлi дась. Ичöтдырсянь ёртасис спорткöд, медся ёна радейтiс котравны лыжиöн. Туйдiс-велöдiс Иван Дмитриевич Пашнин. Ветлiсны быдсикас ордйысьöм вылö, вöлiс вермысьяс лыдын. Пыр на видзö почёт грамотаяссö. Спортыд пö ёна отсалö служитiгад, сэки пö мортыс винёв, ён, сюся котралö. И öнi кутчысьö дзоньвидза оласногö, оз курит, ни оз ю. Лыж пыдди сувтлö лямпаяс вылö, ветлö вöрö.👷‍♂ Армия бöрын районса йöзöс уджöн могмöдан шöрин пыр велöдчис Сыктывкарын «Специалист» шöринын электромонтёрö, а сэсся петiс ас нянь вылö, вöлi самозанятöйöн. Босьтöм специальносьт серти могмöдiс уджалан котыръясöс, тшöтш и олысьясöс. Кыдз гарыштiс ачыс, тайö специальносьт серти пö уджыд век эм.
Тавося январсянь зiльö лунвыв электрическöй сетьяслöн районса юкöнын.

– Кыдз и армияын, сiдз и уджын колö лоны зэв кывкутысьöн. Айловъяслы колö лоны пыр дасьöн дорйыны Айму, и миян уджын – лун и вой дасьöн петны туйö, бырöдны жугалöминъяс-орöминъяс, мед олысьяслöн керкаясын пыр вöлi югыд да шоныд, мед эз сувт предприятиеорганизацияяслöн уджыс, – тöдчöдiс Владислав Сергеевич.
Марина Дадашова.
Снимок Юлия Королевалöн.