Сергей да Ассоль Мишаринъяслысь коми традицияясöн кöлысь ворсöмсö, позьö шуны, аддзылiс став Россия. Кольöм вося декабр помын Москваын ВДНХ шöринын Коми республикалы сиöм лунö и гижсисны.

— Ассольлöн мамыс аддзис интернетысь, мый культура министерство корсьö том йöзöс, кодъяс, эськö, кöсйöны гижсьыны коми ногöн, — сёрнитiс Сергей. — Ми буретш мöвпалiм, кыдзи, эськö, позьö аслыспöлöса öтувтны олöмнымöс, медым дыр кежлö колис паметьö, да Енмыс индiс.

Республикаса культура колледжысь студентъяскöд дасьтысисны тöлысь-кык. Кöлысьыс юргис коми кыв вылын, сы вöсна и том йöзлы колiс тöдны коми кыв да мичаа сёрнитны, кутчысьны сцена вылын. Сергейлы кокньыдджык, сiйö Кулöмдiнысь, бура тöдö чужан кыв. Сьöкыдджык вöлi Ассольлы, но ставыс артмис. Москваын республикаса юралысь Владимир Викторович Уйба чолöмалiс гозъяöс, сиис став бурсö да сьöлöмлы коланасö. Гажыс помасис ставöн öтлаын «Шондiбан» йöктöмöн.

— Регыд на нöшта ветлiм Москваö. Сэнi семья во восьтiгöн «Россия» выставка вылын кыпыда öзтiм семьяпытшса би, — сёрнитiс Ассоль Мишарина. — Ыпъялысь биторъяс лэбисны страналöн 12 регионö. Федерациялöн рытыв-вой кытшын миян республика лоис медводдзаяс лыдын, кытчö воис семьялы сиöм пас. Ми форумсянь биа лампадасö самолётöн вайим Сыктывкарö. Лэбигчöж кутiм, полiм, видзим кыкнан кинаным, весиг здук кежлö эг лэдзлöй. Миянлы зэв нимкодь, мый веськалiм сэтчö, да эскисны миянлы.

Öнi лампадаыс республикаса войтырлöн Ёртасян керкаын. Во чöжнас биыс кытшовтас республикаса кар-районъястi.

— Ыджыд аттьö государственнöй служба да веськöдлöм кузя велöдан республикаса академиялы, кöнi ми уджалам, да велöдчанiнлысь пыркадся «Хатка» уджъёртсö отсöг сетöмысь да ветлöмсö котыртöмысь. Сiдзжö миян республикалы, мый бöрйисны миянöс ветлыны Москваö да Россия пасьтаысь воысьяскöд восьтны семьялысь во, вайны биа лампада, — кыпыд ловкылöмъясöн пасйис Ассоль.
Алёна Ермакова.

Снимокъяс Ассоль Мишариналöн.