Ме пö медся озыр

[ A+ ] /[ A- ]


Ручын пö ме медся озыр мортыс. Тадзи ас йывсьыс висьталö Елизавета Васильевна Расова, кодлы декабр 6-öд лунö тырис 90 арöс. Талун сылöн 16 внук-внучка да 26 правнук-правнучка. 
Чужис сiйö Лунпокаса грездын Василий Павлович да Наталья Афанасьевна Расоваяслöн ыджыд семьяын. Квайт челядь пиысь вöлi медся ыджыдöн, да уджыд сюрлiс ичöтсянь. Муртса на вöлi 10 арöс, кыдзи батьыс юрсö пуктiс война вылын. Нывка отсалiс мамыслы бергöдны гортса овмöс да видзис дзоляджык чой-воксö. 14 арöсöн мöдöдiсны вöрö. Кер петкöдiсны вöлöн, ыстывлiсны и пöрöдчыны. Лэдзисны вöр, сэсся кылöдчисны. Олiсны Кузöбын, Сьöд юын, Сöвкымын. 
— Олiм кöм ни гач, а со 90 арöс нин тырис, — висьталiс серамсорöн олöма ань. 
Кузöбын уджалiгöн рузясис кöмыс, лунтыр пö йиа ва пиын йöткалiм кертö, а рытнас подöн локтiс Лунпокаöдз. Качыд пö ёна отсалiс, бурпöт пö сёйлiм сiйöс. Став вöчöм удж бöрын артавлiсны трудодень. Няньтö медводз пуктiсны поставка вылö, сэсся кольöдлiсны коляссö уджалöмысь йöзлы. 
Михаил Иванович верöсыскöд öтлаын зiльлiсны вöрын. Орччöн олысь да отсасьысь Людмила Михайловна нылыс казьтылiс, мам пö волiс удж вывсьыс сёрöн, нöшта гортын песласьлiс садлы, мед кöть неуна сьöм сетыштасны. Удитлiс и вотчыны. Олiсны уна скöтöн. Миянöс пö чеччöдлiс водз, а пызан вылын пöсь нянь нин. И мöстö пö лысьтiс нин да вöтлiс луд вылö. И кор пö удитлiс ставсö вöчны. Век олiсны картупель да сёркни ыджыд муясöн, видзлiсны кык мöс да вöв, порсь. Кор уджалiсны колхозын, Ручöдз волiсны вöлöн, удж бöрын кайлiсны гортаныс. Елизавета Васильевна колхозын видзлiс куканьясöс, бергöдiс быд сьöкыд уджсö. Бура уджалöмысь сетiсны «За доблестный труд», «Ветеран труда» медальяс да социалистическöй ордйысьöмъясын вермöмысь пасъяс. 
Петiс пенсия вылö, но дыр на уджалiс. 2003-öд воын верöсыскöд локтiсны овны Ручö, кыпöдiсны керка. 2001-öд воын Лунпокаын сотчис грезд джынйыс, со и олысьясыс локталiсны Ручö. Елизавета Васильевнакöд орччöн олö сэтысь жö 95 арöса Вера Афанасьевна Расова. 
Олöма аньлöн внук-внучкаясыс да водзö рöд нюжöдысьясыс разалiсны Россия пасьта. Тшупöда паса лунö пöчлы, ыджыд мамлы видео пыр висьталiсны шоныд сьöлöм вöрзьöдана кывъяс. Кывзiс синва чышкалiг моз. Весиг чужöмыс томмис олöма аньлöн, сьöкыд вояссö шыбитiс пельпом вывсьыс. Чолöмалiсны и Ручын олысь пи да ныв гозъяыс да налöн челядьыс. Людмила Михайловна мамыс моз жö зэв чöскыда пöжасьö, мамыслöн чужан лун кежлö дасьтiс озыр пызан. Волiсны и Ручса юралысь Д.В.Кирушев, олöмаяслöн котырöн юрнуöдысь А.И. Адамова да мукöд. Ставныссянь вичмис шоныд кывъяс да дзоридзьяс, дыр на овны да лоны дзоньвидзаöн бурсиöмъяс. 
Екатерина Ульнырова. 
Руч. 

Комментарии:

Добавить комментарий

Свежий выпуск: за 6 мая