Вермысьяс лыдын

[ A+ ] /[ A- ]


Быд во Коми Республикаын котыртлöны да нуöдöны коми кыв вылын кывбуръяс медбура лыддьысьяслысь конкурс. Сійöс век сиöны тöдчана коми гижысьяслöн тшупöда пас тöдчöдöмлы. Таво вöлі сиöма В.И.Лыткин да А.П.Размысловлы. Колö вöлі öшым тöлысь сизимöд лунöдз ыстыны велöдöм сöвмöдан республикаса институтö видеоролик, кöні 5-11 класса велöдчысьяс ясыда да мичаа лыддьöны кывбуръяс. Могыс сыын, мед казявны коми кыв да литература радейтысьясöс, енбиа челядьöс, медым ышöдны литератураö пырöдчысьясöс да сійöс сöвмöдны окотитысьясöс. Конкурсö пырöдчис 82 велöдчысь. Эз сöмын школаса, но и квайт уджсикасö велöдан канму учреждениеысь велöдчысьяс. Петкöдчисны и Кулöмдін районысь. Ручса шöр школаысь 5 класса велöдчысь Мария Юдина да Помöсдінысь Иван Есев. Кыкнаныслöн медводдза места. Дерт, разнöй арлыда группаын.
Иван 9 класс помалöм бöрын таво пырис республикаса юралысь бердса искусство гимназияö. Помöсдінад сійö унаысь нин дзирдыштöма енбиалуннас. Нина Евлогиевна Шевелёва (Помöсдiн народнöй театрса режиссёр) да Нелли Егоровна Уляшева (роч кыв да литература велöдысь) веськöдлöмöн дасьтöма Константин Симоновлысь «Жди меня» да Тима Веньлысь «Ог тöд, коді менö чужтіс» кывбуръяс. Дерт кöнкö, кыв да литература дінö муслунсö чужтісны Помöсдін школаса роч кыв да литература, коми кыв да литература велöдысьяс.

  • Ваня, кутшöм кывбур тэ бöрйин конкурс вылö?
  • Ме дасьті В.И.Лыткинлысь «Кöсъя ме» кывбур. Сійö меным кажитчис, сы вöсна мый гижöма сьöлöмсяньыс. Меным окота лоис пырöдчыны авторыслöн олöмö и, быттьö сы нимсянь висьтавны тадзи жö сьöлöмсянь. Ме öні велöдча 10 классын театр юкöнын. Гожöмнас кöсйи пырны искусство колледжö режиссёр вылö, но сёрми. Тöдмалі, мый уджсикасö велöдан гимназияын тшöтш жö позьö велöдчыны режиссёрö. Татьяна Александровна Фадеева мамлы нимкодь жö, мый бöрйи татшöм туйвизь. Ме радейта петкöдчыны, кывзыны шылад, юксьыны мöвпъясöн Помöсдінса да гимназияса ёртъяскöд. Дасьтыси кык вежон, велöдыськöд бöрйим паськöм, велöдчим кывны рифма да ритмсö. И збыльысь артмис быттьö В.И.Лыткин нимсянь висьтасьöмыс. Меным нимкодь! Водзö на кута пырöдчыны конкурсъясö. Пырöдчöй и ті!
    Чолöмалам Иван Есевöс да Мария Юдинаöс да сиам выль вермöмъяс.
    Жанна Сизева.
  • Снимок районса администрациялöн сайт вылысь.

Комментарии:

Добавить комментарий

Свежий выпуск: за 6 мая