Кольöм вося сентябр 16–öд лунсянь декабр 6–öд лунöдз 5-11–öд класса велöдчысьяслы мунiс «Войвыв кодзув» конкурс, кодöс сиисны семьялöн волы. 10 школаысь пырöдчис 47 морт. «Литературнöй проза» да «Поэзия» нимпасъясын коми да роч кыв вылын велöдчысьяс петкöдлiсны 49 удж. Сюрöсыс вöлi нёль туйвизь серти. Тайö – «Войналöн йöлöга менам семьялöн олöмын», «Семья – традицияяс видзысь», «Ичöт чужан му дорö муслунöн» да «Радейта ассьым чужан кывйöс». Медуна удж воис «Ичöт чужан му дорö муслунöн» тема серти (20), медся этша – «Радейта ассьым чужан кывйöс» (5).
Уджъяссö видлалiсны арлыд серти. Вермис 11, мöд да коймöд места шедöдiс 17 велöдчысь. Сідзжö торйöн пасйисны кык школаысь кык велöдчысьлысь уджъяссö. Донъялысьяс пасйисны, мый унджык пырöдчысьыс, кыдз босьтчысь поэт да гижысь, пыдiсянь да аслыспöлöса восьтiсны темасö.
Став сьöлöмсянь чолöмалам вермысьясöс да призёръясöс, а сідзжö наöн веськöдлысьясöс! Сиам налы выль вермöмъяс!

Коми кывйöн медся бур уджъяссö йöзöдам газетын.

Мед кылім ассьыным сьöлöмнымöс…

…Позьö помтöг гижны аслад семья йылысь. Бумагаыд оз тырмы. Ме чайта, мый семья – сійö быттьö пу вылын увъяс. Ми ставöн быдмам-сöвмам öтарлань да мöдарлань, нюжöдчам енэжлань да шонділань, но миян вужъяс кольöны öти местаö. Коркö и ми чоя-вокакöд лэбачьяс моз жбыркнитамразöдчам, коді кытчö. Но миян сьöлöмным пыр лоö тані, Мöдлапöв грездын, чужан керкаын, бать-мамкöд. И ме ог мудз шуавны, мый шуда сы вöсна, мый менам эм татшöм семья. Татшöм котыр. Кöсъя, медым ми и водзö тадзи жö олім да вылім. Вöльнöй сьвет вылас абу сэтшöмторйыс, мый эськö ми ог вермöй вöчны öтув.Дзоньнас лыддьöй Вера Уляшевалысь сочинение январ 24-öд лунся газетысь.