Муса мамöй, дона мамöй,
Олан гажöй, шондiбан!

 Мамукъяс, миян мамукъяс! Кутшöма бур вежöн вежала на вылö, кодлöн дiнас олö мамукыс. Мед кöть пöрысь, оз нин вермы, а ловъя, кодлы позьö, кор кöсъян, шуны: «Мамук…».
Ылi 1990–öд во, мунiс таладор югыдсьыс менам мамук Ольга Александровна Воробьёва. Сiдз тай лоис, висьмис, эз дöсадит некодöс, колис миянöс нэм аддзысьлытöм вылö. А мам вöлi мича, юрсиыс кудритчö, нюмбана пыр, синъясыс шоныдöсь, мелiöсь. Уна здук колис нэм кежлö син водзö.

 Со рыт, ломтысьö дзоля пач, а керкаын чöв-лöнь. Ми, куим чоя-вока, тöдам, дурны да шумитны оз позь – мамным прöверитö велöдчысьяслысь контрольнöй уджъяс. Классъясыд вöлiны ыджыдöсь, тетрадьыс уна, дыр лоö корсявны став öшибкатö. Тетрадь чукöр дорас тарелкаын кампетъяс, олас-олас да босьтас öти кампет, разьö и зэв чöскыда сюйö вомас. Век вöлi мам вылö серам петö, тарелкаас оз видзöд, а кампетыд бырö (отсыштö ичöт вок – Ванюк, кодi пызан судтаыс на и мунiгмозыс пыр и судзöдчывлас чöсмасянторйыдла). Мам кинас корсьыштас, а сэсся (быттьö зэв стрöга) юалö: «Кодi гусьöн новлiс?» Ми сералам, тöдам, оз скöрав, сiдз юасьö. Бать зэв ёна вöлi радейтö лыддьысьны, дзоля пач дорö пуксяс и лöняс.

 Мамук зэв бура котравлiс лыжинад, пединститутас вöлi öтувъя котырын. Гашкö сы вöсна и ичöт вокным, Иван, вöлi бур лыжник жö. Ми вöлi ветлывлам походö, кöнi пасö лыйсям винтовкаысь. Мамö да Шурик вок век вермылiсны.

Кутшöма нимкодясьлiс, кор ми «Заря» теплоходöн волiм Ручсянь Керчомъяса пристаньöдз. Ок и чöскыд картупеля шаньга да пувъя пирöг пöжавлiс, вомад сылö. Мичаа вышивайтчис, кужис серпасасьны. Ме дорын эм мамлöн серпасалöмторъяс. Дзик дивö кодь лэбачьяс, зверъяс, вöр-ва. Ыджыд бать (мамлöн батьыс) зэв ёна кыйсис, сысянь вöр-ва радейтöмыс вуджис мамлы, а сэсся и меным да челядьлы. Коми пединститут помалöм бöрын век уджалiс Керчомъяса школаын физика велöдысьöн. Горт гöгöр век вöлi уна дзоридз, парникъяс, öмидз кустъяс. Быдлаöдз тырмывлiс мамлöн киыс. Зэв ёна радейтлiс сьывны батьлöн гудöк улын. Батьö, сиктса ногöн Иван Толя, ок бура няръялiс гудöкнад. Майса праздникъяс вылад век гудöк улын вöлi мунам. Гажа челядьдыр. Муса бать-мам. Ставыс колис ок ылö. А мамуклöн туша-мыгöрыс, мича нюмъялана чужöмыс, век кежлö колис паметьö. Югыдiн да шоныдiн, мамук, мöдар югыдас!

Став мамъяссö чолöмала матыстчысь Мам лунöн! Лоöй дзоньвидзаöсь, шудаöсь, мед век чужöм выланыд лоö радлун, нимкодясьöй челядь вöснаныд, олöмыслы!
 Екатерина Ульнырова.
 Снимокъяс гижысьлöн чукöртöмысь.