Лов кыпöдана удж

Илья Иванович Удоратинöс Сыктывкарса велöдан институт эштöдöм бöрын ёртыс корис реклама вöчан фирмаö. Том мортöс пыр и кыскис тöдтöм, аслыспöлöс удж. Öти во велöдчис вундавны, шыльöдны, сваритны, куснявны, гижны, клеитны баннеръяс, вöчны вит метраа югъялысь шыпасъяс, лöсьöдны макетъяс да с.в. Сэсся лоис бригадирöн. Аскоддьöмъясыскöд зiлис Ухтаын, Интаын, Печораын да мукöд кар-районъясын. 2019–öд воын чужан сиктас – Дереваннöйын, дзоньталiсны Великöй Отечественнöй войнавывса салдатъяслы пас, вöчисны вот инспекция юкöнлы, банк да мукöд котырлы реклама. Содiсны корöмтшöктöмъяс, да 2024–öд воын петiс ас нянь вылö.
– Воськолыс вöлi сьöкыд, мöвпалi, лоöны-ö водзö вылö корöмъяс, эскасны-ö меным. Талун аддза – артмис, – сёрнитiс Илья Иванович.

Сыктывкар бердын ньöбис му юкöн, лэптiс керка, вöчис цех. Сёрнитчö сы дорö шыöдчысьяскöд, вöзйö серпасасьысьяслы компьютерöн вöчны макет, да петкöдлö артмöмсö. Воас кö сьöлöм выланыс, босьтчö уджö. Снимок серти вöчö макет. Бöрйö да ньöбö алюминий, вундалö-куснялö, сваритö колананог. Уджъёртыс лöсьöдöм кöрт вылö, макет серти, зэвтö торъя резина, компьютер отсöгöн вöчö снимок. Ставсö лючки-бура мерайтöм, артыштöм, ёсь пельöсъяс шыльöдöм, лакöн мавтöм бöрын косьтöны.
Медым вöчöмторйыс артмис корöмъяс серти, сы дорын уджалысь специалистъяслысь зiльöмсö видзöдö-арталö ачыс. Уджъёрткöд жö ас машиналöн прицепöн воöдчö местаöдз да пуктö-сувтöдö вöчöмсö.

Кольöм восянь дасьтысим Победалöн тшупöда паса во кежлö. Уналаын выльмöдiсны, сувтöдiсны казьтылан пасъяс. И шыöдчылiсны Илья Иванович дорö. Миян районын сылöн уджъясыс Тимшерын, Помöсдiнын, Скöрöдумын, Дереваннöйын, Пожöгдiнын да мукöдлаын, кöнi «Йöзкостса бюджет» бала серти да асвеськöдлан котыръяс олöмö пöртöны йöзлысь вöзйöм-корöмъяс.
Татьяна Чувьюрова.
Снимок Илья Удоратинлöн.