— Тавося куим тöлысьöн диспансеризация дырйи шыöдчысьяс пиысь медводдзаысь казялiм 221 висьöм, на лыдын 28-ыс сьöлöм-сöн, 9-ыс – кынöм, 2-ыс – сакарысь, 1 — пель бырöм, 1 – лолалöм кузя висьöмъяс. 67 мортöс сувтöдiм учёт вылö, врачьяс урчитiсны бурдöдчанторъяс, на бöрся кутасны видзöдны участокса врачьяс нин, — сёрнитiс шöр бурдöдчанiнöн веськöдлысьöс вежысь Светлана Попова.

Пасъям, таво диспансеризация колö прöйдитны 2008, 2005, 2002, 1999, 1996, 1993, 1990, 1987 воясын чужысьяслы, а 1986 восянь, 40 арöс тырöм бöрын, ставныслы. Диспансеризациялöн медводдза тшупöдын бурдöдчанiнын найö гижöмöн вочавидзасны юалöмъяс вылö, налысь мерайтасны давление, пульс, тушасö, сьöктасö, ЭКГ аппарат отсöгöн видзöдласны сьöлöм. Вирлöн анализ серти тыдовтчас мортыслöн уна-ö холестерин да глюкоза. Бытьысь колö вöчны флюорография. Аньяслы — петкöдчыны гинекологлы, вöчны маммография, айловъяслы — сдайтны анализ вылö вир простатитлысь атниген тöдмалöм могысь. И аньяслы, и айловъяслы нöшта колö сдайтны анализ вылö сiт, медым тöдмавны эм-ö сэнi вир.

Диспансеризация нуöдöмлöн мог – ас кадö эрдöдны дыр кадся висьöмъяс, кодъяс вермöны вайöдны кувсьöмöдз, тайö — сьöлöм-сöн, сакарысь, тыяс, лёк пыкöса нёрпалöмъяс. И тöдмавны, кутшöм помка вöсна сöвмöны тайö висьöмъясыс (вылын давление, холестерин, глюкоза кыптöм, куритчöм, тшöгöм, этша вöрöдчöм).

Диспансеризация нуöдсьö оланiн серти участокса бурдöдчанiнъясын, фельдшерско-акушерскöй пунктын, врачлöн амбулаторияын, öтувъя практикаа врачлöн амбулаторияын. Кулöмдiнын позьö шыöдчыны участокса терапевт либö дзоньвидзалун жырйын уджалысь фельдшер дорö. Гижöдчыны позьö 89222700550 телефон пыр.

Уджалысьяслы диспансеризация вылö сетсьö лун. 40-ысь ыджыдджык арлыда йöзлы вонас öти лун, уджалысь пенсионеръяслы да пенсияводзса арлыдаяслы — вонас кык лун, 18-сянь 39 арöсöдз – куим вонас öтчыд öти лун.

Содтам, диспансеризацияöн унджык олысьöс шымыртöм могысь районса шöр бурдöдчанiн некымын во дорвыв ветлö предприятие-организацияясö. Дзоньвидзалун жырйын уджалысь фельдшер Кристина Рассыхаева босьтö анализъяс, мерайтö давление, тушасö, сьöктасö, тöдмалö пульссö, ЭКГ аппарат отсöгöн видзöдö сьöлöм. Анализ кывкöртöдъясын кö петкöдчö кутшöмкö висьöм, ыстас колана врач дорö. Таво волiс нин районса культура керкаö, лесничествоö, ветлас «Олимпик» ёнмöдчанiнö, спорт школаö, районса да «Кулöмдiн» овмöдчöминса администрацияясö, военкоматö да мукöдлаö.

— Зэв бур, мый волывлöны удж вылöдз. Оз ков сулавны öчередын, мед сдайтны вир анализ. Ставсö вöчöны места вылын, босьтöны анализъяс, ЭКГ аппаратöн видлалöны сьöлöм, вöчöны ставсö диспансеризациялы урчитöм серти. И юöртöны анализъяслысь кывкöртöдъяс. Меным со пыр колö видзöдны вирын гемоглобин бöрся. Диспансеризация дырйи вермас тыдовтчыны кутшöмкö да висьöм, да медбур пыр жö босьтчыны, водзсасьны висьöмкöд дыр бурдöдöм дорысь, — пасйис районса культура керкаысь социокультурнöй юкöнöн веськöдлысь Елена Нестерова.

Марина Дадашова

Снимок Ольга Бобровалöн