Октябр 19-öд лунö «Россия – спортивная держава» войтыркостса чукöртчöм вылын Россияса президент Владимир Владимирович Путин ошкис бокс кузя войтыркостса ассоциацияöн веськöдлысь Умар Кремлевлысь вöзйöмсö, мед локтан 2024-öд восö сины спортлы. Ошкис и Москваын Гöрд изöрд вылын спорт парад ловзьöдöм йылысь мöвпсö. Президент пуктiс мог – 2030-öд воöдз спортöн шымыртны Россияса олысьясысь 70 процентсö.

Тайö вöзйöмсö донъялiс миян районса спорт шöринöн веськöдлысь Елена Дмитриевна Кузнецова:

«Меным, кыдзи веськöдлысьлы, зэв нимкодь, мый мöд во лоö спортлöн воöн. Спорткöд ёртасьöмö, дзоньвидза оласногö шымыртам унджык йöзöс, нуöдам унджык ворсöм да ордйысьöм. Локтан во кежлö миян урчитöма 125 нуöдантор, 60-ыс район тшупöдын, мукöдыс республикаса. Петкöдлам ассьыным вын, тэрыблун, винёвлун, öтувъялун. Лоасны и ыджыд мероприятиеяс, кодъяс öтувтасны став арлыда йöзсö, весиг вермытöмъясöс, кутам дасьтыны республикаын петкöдчöм могысь котыръясöс.
2013-öд вö тшöтш вöлi спортлöн воöн. Сюрсöдз да сюрсысь унджык олысь лыда овмöдчöминъяслы фестивальяс нуöдам торйöн, а сэки котыртiм да öтувтiм став 20 овмöдчöминсö да нуöдiм районса олимпиада, вöлi ыджыд мича концерт. Локтан воын тшöтш ковмас лöсьöдчыны да паськыда нуöдны спорт мероприятие, öтувтны став спортсменсö. Эска, спорт юкöнын уджалысьяскöд, спорткöд ёртасьысьяскöд да водзмöстчысьяскöд öтув зiльöмöн артмас ставыс».
Марина Дадашова.
Снимок вылын: Елена Дмитриевна Кузнецова.