Быд мортлöн школаын велöдчан кадся казьтывлöмъясын, дерт жö, кöнкö, и сэтчöс библиотекаö ветлöдлöм. Торйöн нин ичöт классъясö челядьлы пыр кежлö вежöрас кольö, кыдзи лыддьысянінö пыригас нин вочаалö небöгъяслöн аслыспöлöс дукыс, гöгöр книгаяс тыра джаджъяс, он тöд кытчö и матыстчыны, кутшöм лыддянтор и босьтны, ставсö окота öтпырйö видзöдлыны. Сійö и гöгöрвоана, öд школаö сöмын на локтöм зонпосни кöсйöны тöдны быдтор, паськöдны тöдöмлуннысö.

– Быд во медводдза класса велöдчысьясöс, кор найö велаласны лыддьысьны, тöдмöдам библиотекакöд, мый могысь сійö колö, кутшöм книгаяс тані эмöсь да позьö босьтны лыддьыны, – висьталіс Немдін шöр школаса библиотекаын уджалысь Надежда Ивановна Габова, коді зільö тані 2009–öд восянь нин. – И найö вочасöн босьтчöны лыддьысьны, асьныс бöрйöны сьöлöм сертиныс книгаяс. Водзті вичмöдлісны сьöм, да судзöдлім уна сикас журнал, талун воö сöмын лыда – «Арт», «Бикинь» да «Йöлöга». Книгаясысь кындзи журналъясыс челядьлöн вöліны пыркадся лыддянторъясöн, сэні налы сьöлöм вöрзьöдана гижöдъяс и юржугланторъяс.

Библиотекаыс тані, майбыр, ыджыд, кыпыд, югыд, небöгыс тырмымöн, эм мый бöрйынысö. Надежда Ивановна тані зільö ставка джын вылö, öд сылöн медшöр уджыс – велöдысь. Ас кадö Сыктывкарса госуниверситетын велöдчöм бöрын талун сетö нöшта математика кузя урокъяс. Кыдзкö тай вевъялö велöдан уджын и библиотекаын. Мöдас öд тöжд-могыс абу жö этша, öд челядьöс колö могмöдны учебникъясöн да книгаясöн, тшöтш и велöдысьяслы бöрйыны колана литература. Сылöн висьталöм серти, урокъясысь прöст кадö талун лыддьысьны волывлöны медсясö посни челядь, а гырысьяс гежöдджыка. Гашкö, сійöн, мый ылöдлöны найöс компьютер да телефон. Велöдчан программа кузя унатор позьö босьтны интернетысь. Вермас лоны и сійöн, мый лунтырся урокъяс бöрын налöн кадыс нин абу библиотекаö кежавлынысö. Волöны сöмын сэк, кор велöдысьясныс тшöктасны асланыс предмет кузя лыддьыны колана гижысьлысь висьтъяс ли книгаяс, со и босьтöны найöс, джудждöдöны мывкыдлунсö.

Книгаясöн могмöдöмысь кындзи Надежда Ивановна библиотекаын вöчлö и торъя тематика серти выставкаяс – кутшöмкö тöдчана лунъяслы да праздникъяслы либö велöдан литературалы сиöмöн. Тшöтш и туй вылын ветлан правилöяслы сиöмöн, медым челядь лючки тöдісны найöс. Артмö, сійö отсалö нывзонлы мывкыдлунсö паськöдны оз сöмын книгаяс лыддьыны ышöдöмöн да радейтöмöн, но и тадзи содтöд тöдöмлунъяс сетöмöн.
Галина Нестерова.
Снимок Надежда Габовалöн чукöртöмысь.