2025–öд вося май 15–öд лунö видзму овмöс министерство нуöдіс «Агростартап» да «Видз-му овмöс потребительскöй кооперативъяс лöсьöдöм да сöвмöдöм» нимпасъяс серти вузöс вöчысьяслы гранта отсöг вылö конкурс. Миян районысь петкöдчисны да вермисны кыкöн.  

«Агростартапö» пырöдчысь Ксения Васильевна Напалкова кöсйö лöсьöдны форель чери йывмöдан овмöс. Сiйöс збыльмöданін – «Застава Коми» гöсьтъяслы усадьбалöн мутас дорын. Вöчис нин ваöн могмöдан скважина, дасьтiс модульнöй видз-му овмöс цех да биологическöя весалан станция сувтöдöм вылö площадкаяс. Балаыслöн доныс – 5500 сюрс шайт, сы лыдын «грант» – 4995 сюрс шайт да аслас сьöм – 555 сюрс шайт. Сьöмсö лоö веськöдöма модульнöй цех, пöдса ваöн могмöдан кык устройство да арпи ньöбöм вылö. Лöсьöдiс да дорйис «Верхневычегодское форелевое хозяйство» вузöс пас.

«Пожегодский» кооператив вöзйис дзоньтавны йöв да сыысь вöлöга вöчанiн. Балаыслöн доныс – 9516 сюрс шайт, сы лыдын «грант» – 5500 сюрс шайт, «Сыктывкарса ЛПК» акционер котыркöд сёрнитчöм серти районса администрациялöн сьöма отсöгыс – 1900 сюрс шайт да кооперативлöн ас сьöмыс – 2116 сюрс шайт. Сьöмсö веськöдасны вый вöчанiнлöн вевт, пыранiнъяс, öшиньяс да керкаыслысь конструкцияяс тырвыйö вежöм вылö, подув да джоджъяс, ломтысянiн лöсьöдöм вылö. Збыль вылас – выль стрöйба. Оборудованиесö кöсйöны ньöбны 2026-2027–öд воясö 7000 сюрс шайт дон, сы лыдын тшöтш и потребительскöй кооперативъяслы 50 процент ыджда субсидия тшöт весьтö.

Анастасия Ярова, видзму овмöс юкöнöн веськöдлысь.