Кольöм восянь Дмитрий Николаевич Попов уджалö участкöвöйöн. Сылöн дöзьöр улын Аныб, Руч, Дереваннöй, Носим, Паспом сиктъяс. Мужичöй олiс Ручын да зэв бура тöдö сэтчöс йöзöс. Кодкö кö шыасяс, тайö вожас колö ветлыны дзик быд лун. Воторник, четверг да субöта йöзöс примитан лунъяс. Кор мöд участокысь полицияын уджалысь петö отпускö, сiйöс тшöтш колö вежны.

 Дмитрий Попов чужис-быдмис Ручын. Армияын служитiс пытшкöсса делöяс министерстволöн войскаын. Тайö отсалiс и сы бöрын пырис уджавны закон дорйысьö, сэки вöлi шусьö милицияöн на. Сэсся сэтысь петiс да заводитiс перйыны нажöтка вахтаясöн. 2018-öд воын бöр пырис уджавны полицияö. Ветлiс командировкаясö. 2023-öд воын эштöдiс велöдчöмсö Улыс Новгородса пытшкöсса делöяс министерстволöн академияын. Велöдчигöн позис бöрйыны лоны оперативнöй уджалысьöн либö экономика видзöм кузя туйвизь. Дмитрий Николаевич шуис велöдчыны административнöй удж нырвизь кузя. Муртса пö кокньыдджык.

 Дмитрий Николаевич 25 во нин олö гöтырыскöд Кулöмдiнын. Челядьыс гозъялöн ыджыдöсь нин. Пиыс школа помалöм бöрын куим во велöдчис Кировын видзчысьтöм лоöмторъяс да йöзöс доръян службаса уджалысьö. Сы бöрти мунiс армияö. Регыд воас бöр гортö. Нылыс велöдчö на школаын сизимöд классын.

 Дмитрий Николаевич Попов серти участкöвöйлöн уджын колö видзöдны уна йöз бöрся, кодлöн эм ружье, машина, кодi торкалö оланпас. Ставныскöд колö нуöдны колана сёрни.
 Наталья Тимушева.
Снимок гижысьлöн.