27 кубометра контейнеръяс сулалöны нин «Север» котырлöн база йöрын рельсъяс вылын. Твер обласьтысь «РЖЕВМАШ» заводысь специалистъяс тэчисны пресс-компактор, март панасын босьтчисны да вöчисны кык вежонöн, велöдiсны сы вылын уджавны «Северын» зiльысь мортöс. Районса 23 сикт-посёлокысь миян котырöн вайöм шыблас кутасны кисьтны бункерö, сэнi ставыс топалас да веськалас контейнерö. Öти морт компьютер отсöгöн и кутас веськöдлыны став уджнас. Тыра контейнер рельсъяс кузя вешъяс помöдзыс, сэтысь и кутас босьтны «Региональный оператор «Севера» котырлöн шыблас новлöдлан машина.

• Миян котыр база йöрын вöчис-шыльöдiс тайö выль оборудованиесö сувтöданiн, подувсö. Талун машинаяслы матыстчöм могысь вöчам эстакада. Сiйö лоö кöртысь да бетонысь. Зiльöны асланым уджалысьяс. Урчитiм эськö эштöдны апрель помын, но гашкö поводдяыс оз на лэдз, да озджык артмы. Колö, мед шондöдыштас, да кисьтны бетон, — сёрнитiс «Север» котырöн веськöдлысьöс вежысь Артём Иванович Попов.
  Пасъям, мый районса да кутшöмсюрö администрацияяслöн водзмöстчöмöн районын став сикт-посёлокын нин сулалöны контейнеръяс. Йöз велалiсны выльнога чукöртöмö, да тöдчымöн сöстöммисны налöн чужанiн-оланiнъяс. И бара на выль воськов. Республикаын миян районын медводдзаöн вежöны шыблас чукöртанног да нуанног.
  Марина Дадашова.
  Снимокъяс Артём Поповлöн.