Öшинь дорын пукалiгöн виччысьö, кор почтальон локтас выль газетöн. Пыр на лыддьыссьö, оз кольччы олöмысь.

 — Нимкодь лыддьыны ас йöз йылысь, кыдзи найö олöны, зiльöны. Кытчöдз верман, колö уджавны, отсасьны мыйöн верман, öд ставыс тайö олöмас тэныд жö бöр и бергöдчас, — сёрнитiс Мария Иясоновна Тарабукина, кодлы ноябр 16 лунö тырас 85 арöс.

 Чужис Керчомъяын. Батьыс юрсö пуктiс вöрöгкöд тышын, кор нывкалы вöлi кык арöс. Анна Кондратьевна Кочанова мамыс öтнасöн быдтiс нёль челядьöс. Нэм чöжыс уджалiс колхозын, зiлис скöт дорын.
Мария Иясоновна помалiс квайт класс. Кынöмпöт шедöдöм могысь лэччис Кулöмдiнö. Видзис öтилысь да мöдлысь ичöт челядьöс. 19 арöсын мунiс карö. Сэнi пырис уджавны стрöитчысьяслöн котырö каменщикöн. Вöлi сьöкыд. Век ывлаын, кöть шоныд, кöть кöдзыд. Тайö уджыс эз во сьöлöм вылас, да Мария Иясоновна корсис мöдöс. Аддзис юöр, мый ресторанö колöны уджалысьяс. Шыöдчис сэтчö. Велöдiсны пöжавны пирöгъяс, пончикъяс, шаньгаяс. Аньлы тайö кажитчис, да и уджъёртъясыс шаньöсь вöлiны, век отсасисны öта-мöдныслы. Пöжасыс вöлi чöскыд, да карса олысьяс зэв öдйö босьтавлiсны. Кык во мысти мамыс корис гортас. Удж вылысь эськö оз вöлi лэдзны, кольöдöны карö. Но ань бергöдчис чужанiнас.

Керчомъяын Мария Иясоновна пусис садйын. Квайт во вердiс-юкталiс челядьöс. Чужан сиктын тöдмасис Альберт Иванович Тимушевкöд. Гижсисны, чужис кык пи Александр да Анатолий. Верöсыс зiлис милицияын. Сiйöс вуджöдiсны Лöгинъягö, сыкöд и мунiсны семьянас. Мария пырис уджавны столовöйö. Но верöсыс кутiс юыштавны. Ань öлöдiс сiйöс, но мужичöй эз кывзы. Семья торксис, Мария Иясоновна босьтiс кыкнан писö да бöр локтiс чужан сиктö.

 Уджалiс садйын, та бöрын столовöйын, сэсся и нянь пöжаланiнын.
Коркö аньлы нюмдiс жö шудыс. Сiйö паныдалiс Анатолий Генрихович Тарабукинöс. Зiль, шань мужичöй воис сьöлöм вылас, да найö овмöдчисны öтлаын, сэсся и гижсисны. Сиктад öд нывбабаыдлы мужичöйтöгыд сьöкыд. Керка дзоньтавны, пес пилитны-поткöдлыны век ковмылiс кодöскö медавны, да и кык пи быдмисны. Найöс тшöтш колiс велöдны мужичöй уджас.

 Удж кындзи нокыс тырмылiс и гортас. 63 арöсöдз зiль ань видзис и мöс, и порсь. Öнöдз на вöдитö картупель, свеклö, кушман да морков. Водзтi помидор и öгурцы на быдтывлiс. Йöр пытшсö быд гожöм мичмöдöны уна сикас дзоридзьяс. Том дырйиыс вотчылiс, тусь-тшакысь вöчлiс уна чöскыд сёян. А öнi кокъяс пö абу нин сэтшöм тэрыбöсь, рöдвужыс либö нывъёртыс вайöны сылы вöрса нуръясянторъяс.

Мария Иясоновна киподтуя морт. Некор прöста оз ов. Кужö и вурсьыны, и вышивайтчыны, и печкыны, и кыны мича сера кепысьяс да носкияс. Кысьыны велöдлiс мамыс. Рöдвужлы да нывъёртъяслы вичмис аньлöн шоныд кепысь-носкияс.

Водзтi быд гажъяс дырйи Мария Иясоновна радейтлiс сьывны, тшöтш и гажъяс вылын петкöдчылiс сиктса аньяскöд. И пыр на казьтывлö сiйö кадсö.
Наталья Тимушева.
Снимок Светлана Логиновалöн.