Зэв кывкутана удж

[ A+ ] /[ A- ]

 Андрей Максимович Напалковöс ичöтдырсянь кыскис техника дорö да 16 арöссянь шуис велöдчыны шоперö. 17 арöсын «В» категория вылö сдайтiс экзамен. Сэтшöм окота вöлi зонлы пуксьыны руль сайö, мый 18 ар тырöмöн босьтiс нин водительлысь удостоверение. Школа бöрын 34-öд номера Сыктывкарса политехническöй техникумын велöдчис автомеханикö. Лоис техника могмöдöм да автомобиль дзоньталöм кузя специалистöн. Таво том морт босьтiс трактористлысь право. Олöмад пö ставыс ковмас.

 Техникум бöрын во джын гöгöр уджалiс Пузлаын автомеханикöн. Но сьöлöм вылас эз во вахтаöн ветлöмыс. Пырис уджавны Кулöмдiнса автозапчасьт вузавлан лавкаö. Медводз донъялiсны машинаöн бура вöдитчöм да веськöдлан сям. Груз новлан машинаыд автомобильысь ыджыдджык, но та вылö видзöдтöг Андрей ставсö вöчис кыдзи колö, да сiйöс босьтiсны ваявны карсянь груз. Во да джын зiлис сэнi. Сэсся Сергей Игушев ёртыс корис сiйöс уджавны йöзöс карöдз таксиöн новлöдлан службаö. Донса зон кык сайö во нин сэнi. Таксистöн уджалiгад веськавлöны быд пöлöс йöзыс, да колö лöсьöдчыны быдöнкöд. Öтилы жар, мöдлы кöдзыд; кодлыкö колö мед юргис музыка, кодлыкö колö лöнь; öтилы колö мунны ыджыдджык öдöн, мöд öлöдас, мый колö мунны тэрмасьтöг. Та вылö видзöдтöг таксистлы колö лоны вежавидзысьöн. Машинаöн мунiгöн туй вылын паныдасьлiсны кöч, ош, руч, ур, кабан. Йöраöс эз на аддзыв.

 Андрей серти водитель — тайö зэв кывкутысь морт, сiйö кывкутö сыкöд мунысь йöзлöн олöм вöсна. Водительяслы Андрей Максимович сиö кутчысьны туй вылын урчитöмторъясö, лоны вежавидзысьöн. Регыд усяс лым, да колö ветлыны видзчысьöмöн. Казялiн кö, мый машина сулалö туй вылын да корö отсöг, пыр колö сувтны да нюжöдны ки. Öтчыд Андрей казялiс Пöдтыбок сайын сулалысь машина. Вöлöмкö, шоперлы вöлi зэв лёк, а сотöвöй телепон сэнi эз кый. Донса зон мунiс неуна водзöджык да корис «Тэрыб отсöг сетан» служба. Виччысис локтöмсö. Мужичöйлöн топöдiс сьöлöмсö.

 Водзö вылö том морт мöвпалö уджавны автоинструкторöн. Велöдны йöзöс веськöдлыны машинаöн — тайö шоперлöн вель жö ыджыд кывкутана удж.
Наталья Тимушева.Снимок Артур Гарновлöн.

Комментарии:

Добавить комментарий

Свежий выпуск: 7 февраля

Осторожно — мошенники!