Юрсиктса «Олимпик» ёнмöдчанiнö вермытöм верстьö окотапырысь волывлöны быд сикт-посёлокысь. Таын ёна отсалöны меставывса администрацияяс — могмöдöны машинаöн. Котралöны лыжиöн, ворсöны шахматöн, теннисöн да дарцöн, лэпталöны гира да штанга, вермасьöны киöн, вöчöны ГТО-лы урчитöмторъяс. Петавлöны и республика тшупöдö, петкöдчöны Раиса Сметанина нима лыжиöн котраланiнын, ветлöны юркарса бассейнö.
Квайтымын кык арöса Валентин Васильевич Липин дзолядырсяньыс лёка аддзö, но 50 метра вартчигöн лоис медводдзаöн, котöртiс и лыжöн.

Уллянаын чужлöм, а сэсся мамыскöд Дереваннöйö вуджöм зонка гожöмнас котравлiс чери кыйны да купайтчыны, тöвнас исласьлiс лыжиöн да даддьöн, аскоддьöмыскöд лыйсьылiс ки помысь вöчöм тювйöдлан шыöн, бергöдiс гортгöгöрса удж, отсасьлiс мамыслы петкöдлыны культура керкаын кино. 1994-1995-öд воясын синтöмъяслöн республикаса котырсянь ыстылiсны Волокаламскö велöдчыны вурсьыны, дöмсьыны, вöчавны пу паньяс. Дзолядырсяньыс уджö велалöм морт оз пов сьöкыдлунъясысь, сьöлöмсяньыс босьтчö выльторö. Öнi Валентин Васильевич сяммö вурны ключьяс видзан кöшель, дöмсьö, нöшта на пöжасьö. Медводз ыджыдджык чойыс велöдiс гудравны няньшом, а сэсся синтöмъяслöн ставроссияса котырысь коми юкöнсянь сетiсны бисянь уджалысь лупа. Валентин ньöбис аслыс мультиварка, сыкöд тшöтш вöлi и пусян-пöжасянногъяса небöг. Лупаыслысь проводсö йитö телевизорö, а асьсö новлöдлö гижöдтi. Телевизорын тыдовтчöны вель ыджыд шыпасъяс. Тадзи айлов лыддьысьö да сяммö вöчны уна коланатор. Спорткöд ёртасьны заводитiс куим во сайын, ветлывлö и республикаса ордйысьöмъяс вылö. В.В.Липинöс пасйисны почёт грамотаясöн, чукöрмис нин дас медаль.
Позьö шуны медводдзаяс лыдын «Олимпик» ёнмöдчанiнö локтiс Максим Александрович Леонов. Ичöтсяньыс ветлöдлiс лыжиöн, велöдчис ворсны гитараöн да баянöн, лöсьöдлö и сьыланкывъяс. Гортас отсасьö весавны лым, пыртö пес-ва да пелькöдчö. Водзтi кö ёнлунöн вермасьöмъясын Максим овлiс мöд да коймöдöн, со öнi сöмын медводдзаяс лыдын.

• Зэв нимкодясьö пиöй, кор артмö ставыс, торйöн нин гира лэпталöмын, — юксис Анна Васильевна мамыс.
  Öнi Максим окотапырысь вежоннас куимысь ветлывлö «Олимпикö», бура кужö ворсны и шахматысь да лыйлыны шы. Тшöкыда лэччывлö Сыктывкарö вермытöмъяслöн республикаса ордйысьöмъяс вылö. Эмöсь медальяс да грамотаяс.
  Татьяна Чувьюрова.
  «Олимпик» ёнмöдчанiнлöн чукöртöмысь снимокъяс вылын Валентин Васильевич Липин да Максим Александрович Леонов.