Декабр 28-öд лунö Вöльдiнын восьтiсны выль социокультурнöй шöрин. Кыпöдiсны стрöйбасö во джынйöн.

Öти вевт улö меститчисны лыддьысян да гажöдчанiн. Нуöданторъяс кежлö дасьтысьны эм тырмымöн жыръяс да талунъя корöмъяслы лöсялана став коланаыс. Стрöйбаыс артмис кыпыд да шоныд, меститчис сикт шöрын дзик мир туй бокын.

Чолöмавны сиктсаясöс ыджыд лоöмторйöн волiсны республикаса культура, туризм да архив делöяс кузя министр Мария Алексеевна Балмастова, «Кулöмдiн» муниципальнöй районса юралысь — администрацияöн веськöдлысь Сергей Владимирович Рубан, сiйöс вежысь Василий Витальевич Бадьин, районын культура управлениеöн веськöдлысь Анастасия Владимировна Голайдо да мукöд.

Ыджыд козинъясöн лоины «Комилесбизнес» котырöн веськöдлысь А.С.Игнатовсянь гаж петкöдлан залса öшиньясö мичмöдöм занавесъяс да ас вылö уджалысь Д.А.Уляшевсянь аккордеон.
Выль сцена вывсянь петкöдчисны районса да Помöсдiнса культура керкаясысь, Выльгортса клубысь сьылысь-йöктысь-гажöдысьяс.
Ольга Васильева.
Снимокъяс гижысьлöн.