Дiасёръяысь Мамонтовъяслöн семья винёвлунöн да тэрыблунöн дзирдыштiс республикаса фестивальлöн ГТО-öн урчитöмторъяс кузя семьяяслöн ордйысьöмын. Август 23-28-öд лунъясö республикасянь петкöдчасны Санкт-Петербургын.

— Уджала школаын велöдысьöн, нöшта завучала. Иван Александрович Мамонтов верöсöй спорт школасянь уджалö инструкторöн. Ачыс водзмöстчö спортын, таö ышöдö посёлокса челядьöс, олöма йöзöс. Верöсысь ог кольччöй и ми, пиянным да менам мамöй. Петкöдчылiм да вермим районса ордйысьöмъясын, — сёрнитiс Александра Алексеевна Курочкина.

Иван Александрович нуöдö секцияяс да кружокъяс, пырöдчö спорт туйвизьын районса нуöданторъясö. Челядькöд да олöмаяслöн котыркöд, кытчö пырöдчö и гöтырыслöн Антонина Петровна Курочкина мамыс, ветлöдлöны район пасьта. Найö пыр дасьöсь петкöдчыны ордйысьöмъясын да ворсöмъясын. Котыръяскöд туйö тшöтш петö и семьяыс. Кöнi кö да «висьöны» асланыс посёлоксаяс вöсна, а кöнi кö да петкöдчöны и асьныс. Неважöн мунiсны велосипедъясöн. Тöвнас ветлiсны Емдiн районö сиктса спорт фестиваль вылö. Вермисны семьяяслöн ордйысьöмын.

Эз чайтны, мый вермасны и республикаса фестивальын. Ордйысисны варччöмöн, стадион вылын котралöмöн да спортзалын урчитöмторъяс вöчöмöн. Шензьöдана, мый Иван Александрович варччöмын лоис медводдзаöн. Колö пасйыны, районын абу бассейн, посёлокын «тренирутчанiныс» — асланыс Вöль ю.

«Йöзкостса бюджет» ба-ла серти кольöм воын Дiасёръяын сувтöдiсны ывлавывса тренажёръяс. Никита да Семён пияныскöд Иван Александрович сэнi матö быд лун песöны вын-эбöс, дасьтысьöны ордйысьöмъяс кежлö. Александра Алексеевна ёнмöдчö гортас. А öнi лöсьöдчöны ыджыд карö мунiгкежлö.

— Татшöм ордйысьöм вылö петам медводдзаысь на. Локтасны Россия пасьтаысь. Кутам дасьтысьны, медым тöдiсны, мый республикаса ылi посёлокын, кöнi абу ыджыд спортзал, ёна ёртасьöны спорткöд, — пасйис Александра Алексеевна.
Алёна Ермакова.
Снимок öтуввезйысь.