Помöсдiнын быдöн тöдö Изеркиль Порошкин купечлысь керкасö (сиктса ногöн Езьö керка). Сулалö сiйö сикт шöрын, кулинариялы воча. Бöръя кадö танi меститчылiс школаса музей. Выль школа восьтöмöн стрöбасö вуджöдiсны сиктса администрациялы.
Помöсдiнса асвеськöдлан котыр, кодöн юрнуöдö зэв водзмöстчысь да чужан сиктын олöм бурмöдны зiльысь Нина Ивановна Карманова, 2021-öд во помын шедöдiс музейсö выльмöдöм вылö республикаса юралысьсянь 622 сюрс 840 шайт дон грант.
Ыджыд удж бергöдiсны водзмöстчысь войтыр. Выльысь мавтiсны-мичмöдiсны жыръяс, сиктса кужысь войтыр отсалiсны выльмöдны пытшкöсса эмбур, öшиньяс мичмöдiсны музейлы лöсялана мича занавесъясöн. Выльмöдiсны стендъяс да корсисны содтöд экспонатъяс. Талун на сиктса войтыр вöзйöны уна вояс сайын вöдитчан гортса да уджалан эмбур.
Сиктса музейын чукöрмис Помöсдiн сикт, вöвлöм леспромхоз, совхоз, школалöн сöвман туйныс. Пасйöмаöсь тшöтш чужан сиктсö нимöдысь спортсменъясöс. Торъя места музейын босьтöны В.П.Кунгин да Изеркиль Порошкин семьяяслы сиöм стендъяс.
Выльмöдöм музейын интереснöй экскурсияяс нуöдö уна тöдöмлуна краевед Александр Васильевич Шебырев. Сöмын таво нин татчöс экспонатъясöн тöдмасьны волiсны 500 гöгöр морт.
Снимок Нина Кармановалöн архивысь.