Абу гусятор, мый быдлаын, сiдз миян районын, паськалiсны быдсикас электроннöй чигаркаяс, куритöны верстьö, томъяс, весиг велöдчысьяс. Бать-мам да велöдысьяс пыр тшöкыдджыка аддзöны челядьлысь выльпöлöс куритчанъяс.

Ныв-зонъяс оз гöгöрвоны да висьтавлöны, абу пö табак да лёк сир, сiдзкö, абу öпаснöй. Найöс лэдзысьяс лыддьöны жö, мый тшынтöм чигаркаяс некутшöм лёк оз вайны дзоньвидзалунлы. Но врачьяс эскöдöны мöдарö. Татшöм куритантор кыскалiгöн морт апалö уна сикас пагöдантор. Никотиныс медся öпаснöй, а мукöдыс содтöд пыдди. Тайö никотина кизьöртор, пропиленгликоль, глицерин, чöскыд кöръяс да мукöдтор.

• Куритчыны заводитысь челядьлöн медводз тшыксьö вей да рочöн кö нервнöй система. Удж вöчигöн ыпкöны, ловныс тырö. Öдйö дöзмöны да скöрмöны, тшöкыда ылалöны да ёна лыбзьöны, — сёрнитiс шöр бурдöдчанiнысь дзоньвидзалун жырйын уджалысь фельдшер Кристина Леонидовна Рассыхаева. — Пыр тшöкыдджыка челядь пöвстысь аддзан этша вира (малокровиеöн) висьысьöс, лёка аддзысьöс да кылысьöс да с.в. Куритчысь челядь велöдчигöн мöвпалöны сöмын тшынöдчöм йылысь, оз сюся кывзыны урок вылын, переменаяс дырйи оз шойччыны. Лунсö коллялöны школа йöрын, оз велöдчыны. Куритчöм оз лэдз сöвмыны том вир-яйлы. Спорткöд öтув оз жö артмы «мунны», вын-эбöсныс оз тырмы.
  
• Кольöм воын Кристина Леонидовна унаысь ветлiс сёрнитны Кулöмдiнса школаын велöдчысьяс дорö. Медводз висьталö, кытысь локтiс чигаркаыс, мыйысь вöчöма. Мыйöдз вайö велöдчысьöс электроннöй чигарка видлалöм-дурöмыс. Öд медводзаысь видлысьяс унаöн кöсйöны лоны «ас мортöн», мед эз торъявны мукöдсьыс. Серпасъяс пыр тöдмöдö чигаркалöн лёклунöн. Велöдчысьяс кывзöны да юасьöны. Помас налы разöдö öлöдан гижöдъяс.
• Велöдчысьяслы öд оз донтöма сувт вейпъясöн дурöмыс, — водзö висьталiс дзоньвидзалун жырйын уджалысь. — Велалöны, но оз век сюр сьöм. Том йöз сэсся вуджöны прöста чигарка вылö, висьмöны быдпöлöс лёк висьöмнас. Висьтала, мый öнi куритчöм абу нин модаын. Томъяслы колö лоны дзоньвидзаöн, сюртчыны спортö, прöст кад сетны ловкыпöданаторлы, радейтана уджлы да мöвпавны водзö бур олöм йылысь. Мунны воча бать-мамлы, велöдысьяслы. Том йöзöс зэв сьöкыд веськöдны колана туйö, пуктыны ас местаö. Но кутам лача, нывкаяс да зонкаяс гöгöрвоасны, мый оз ков сетчыны лёкö. Медым видзны ассьыд дзоньвидзалун, бурджык дзикöдз эновтчыны никотин кыскалöмысь.
  Алёна Ермакова.
  Снимок Кристина Рассыхаевалöн.