Диспансеризацияöн унджык олысьöс шымыртöм могысь районса шöр бурдöдчанiн мöд во дорвыв ветлö предприятие-организацияясö. Дзоньвидзалун жырйын уджалысь фельдшер Кристина Леонидовна Рассыхаева босьтö анализъяс, мерайтö давление, тушасö, сьöктасö, тöдмалö пульссö, сьöлöм видлалö ЭКГ аппарат отсöгöн. Анализ кывкöртöдъясын кö петкöдчö кутшöмкö висьöм, ыстас колана врач дорö.

– Кольöм воын кытшовтi зэв уна предприятие. Таво босьтчи Ульянаса манастырсянь. Торйöдiсны туй морт керкаын жыр, сэнi и видлалi вежа айясöс да уджалысьясöс. Ветлi районса культура керкаö, некымын лун уджалi ыджыд вöр овмöсын, «КомиИнвестПром» котырын. Ветла бара жö уджалысь уна лыда лунвыв электрическöй сетьяслöн районса юкöнö. А водзö сэсся райвоенкоматö, районса йöзöс уджöн могмöдан шöринö, пенсия фондлöн районын клиентъяслöн службаö, садъясö да мукöдлаö. Диспансеризация нуöдöм могысь аскöд новлöдла став коланасö. Веськöдлысьясыслы юöрта водзвыв, юала, кор бурджык локны, мед уджалысьяс локтасны тшыгйöн, ЭКГ прöйдитны босьтасны рузум. Йöзыслы зэв воö сьöлöм выланыс. Оз нин ков мунны бурдöдчанiнö, локтöны дiнаныс. Асьным пö ог жö слöймöй-а. Уна висьöм оз петкöдчы, и мортыс оз тöд. Диспансеризация дырйи вермас тыдовтчыны, да дыр бурдöдöм дорысь бурджык пыр жö и босьтчыны, водзсасьны висьöмыдкöд. Сикт-посёлокъясын олысьяс вермасны шыöдчыны асланыс терапевт либö фельдшерско-акушерскöй пунктъясын фельдшер дорö, – пасйис Кристина Леонидовна.

Содтам, тайö вежонсянь быд субöтаö дзоньвидзалун кутасны видлавны велöдысьяслысь да школаын уджалысьяслысь, тшöтш и нуöдасны диспансеризация.

Марина Дадашова.

Снимокъяс Алёна Нестеровалöн.