Июль 12-öд лун — Петыр да Павел вежа апостолъяслöн лун, кодöс пыр ыдждöдлöны Енлы эскысьяс. Кыпыда пасйис сiйöс и тайö жö вежаяслöн нима Кулöмдiнса вичко. Водз асывсянь танi чукöрмис уна йöз: верстьöяс да поснияс, ас сиктсаяс да районсаяс, весиг бокиысь локтöмъяс. Кыдзи и пыр, медводз мунiс ыджыд служба. Архиепископ Питиримöн юрнуöдöмöн службасö нуöдiсны Кулöмдiнса да Зимстанса вичкоясысь вежа айяс Александр да Иоанн, отсасис сiдзжö соборбердса йöзкостса хор, кодöн веськöдлö миян районысь петöм Александр Шахов. Локтöмъяс пиысь унаöн висьтасисны да даръясисны. Служба помын вла-дыка Питирим тöдмöдiс, кодъяс сэтшöмъясыс Петыр да Павел вежа апостолъясыс, кыдзи пырöдчисны Енлы эскöмлань да лоисны сылы отсасьысьясöн.
Водзö кыпыд гаж вöлi ывла вылын. Бур кöть мойвиис поводдяöн: мича, шондiа лунад и йöзыс чукöрмылiс нöшта на уна. Найöс вочаалiс да вичкоса праздникöн пöся чолöмалiс владыка Питирим. Сiйö пасйис:

• Миянлы талун зэв ёна колöны Пётр да Павел вежа апостолъяс кодь ён бурсьылысьяс. Пётр вежа апостол Иерусалимын öти туйдöм-велöдöмöн Енлы эскöмлань бергöдiс быдса вит сюрс мортöс. Кор лоас татшöмыс и миян? Талун бать-мам бура велöдчысь челядьöс мöдöдöны институтъясö, а колö эськö медым ышöдiсны мунны духовнöй семинарияö. Колö öд Енмыслы сетны медся бурсö. Кыдзи Пётр да Павел апостолъяслöн кадö, кор Енлы эскöмыс йöзлöн, торйöн нин айловъяслöн, вöлi ён, кыпалiсны вичкояс. Но тайö ставыс на бергöдчас бöр. öнiя солдатъяс, торъя военнöй операцияын служитысьяс, Айму дорйысьяс талун, видзöдан да, пыдöдз жö нин пырöдчисны Енлы эскöмö. Ставным кö лоам Сылы эскысьясöн, и ставнас государствоным тшöтш, венам быд вöрöгöс.
  Чолöмалан кывъяс вись-талiс и районса администрацияöн веськöдлысьöс вежысь Н.А.Левченко. Владыкалöн Енлы эскöм йылысь кывъяс дорö сюртчöмöн содтiс, мый буркыв вексö видзлiс быд мортöс. Ми олам сэтшöм кадö, кор буретш буркыв вермас быдöнлы козьнавны эскöм да лача. Вежа ай Александрлы праздник кузя вичмöдiс козин.
  Мичаа сьылöм-йöктöмöн да кывбуръяс висьталöмöн, шылада инструментъяс вылын ворсöмöн видзöдысьясöс гажöдiсны Кулöмдiнысь «Росинка», «Домисолька», шылада школаысь челядь, Свято-Стефановскöй кафедральнöй соборса регент Александр Шахов, Кебанъёльысь Анастасия Мосина да мукöд. Кыпыд гаж бöрын ставöн öтув нуръясисны да ветлiсны Николай Чудотворецлöн вежа ключ дорö.
  Галина Нестерова. Снимокъяс гижысьлöн.