Август мöдöд лунö Кулöмдінысь Мария Ефимовна Попова ыдждöдліс 85 арöс. Сы вылö видзöдöмöн сылы та мында арлыдсö весиг он сет: ен сыкöд, петкöдчö ёна томджыкöн, зэв авъя нюма, тэрыб вöраса, шмоня сёрниа, варов, важ олöмсьыс унатор тöдысь да висьтавны радейтысь.

Ачыс сійö Кöрткерöс районса Висерысь. Школаас велöдчигас на мöвпаліс лоны трактористöн либö радистöн. Но векжö школа бöрас, гашкö, чойыс вылас видзöдöмöн, велöдчис библиотекарö. Сэкжö гуся мöвпсьыс эз лэччысь да нöшта шедöдіс радиооператорлысь специальносьт. Сыктывкарса авиаотрядсянь 18 арöса нылöс мöдöдісны уджавны радистöн Кулöмдінса аэропортö. Сэки буретш кыпöдісны сылысь выль керка да вуджисны татчö, важыс вöліс мöдлапöлын. Колö шуны, мый аньлöн уджыс и олöмыс топыда йитчисны аэропортлöн историякöд. Мария Ефимовна квайт во зілис радистöн, а сэсся 28 во пассажиръясöс новлöдлöм кузя диспетчерöн.

– Уджалан котыр миян вöлі ичöт, – казьтывліс сійö. – Лэбаліс тані ЯК-12. Сёрöнджык, кор Кулöмдінса аэропорт лоис базöвöйöн, миян лоис пыр кадся кык АН-2 самолёт. Найö лэбалісны сикт-посёлокъясö, кöні вочасöн воссисны аэропортъяс. Районын ставыс вöлі сійö 12. Кулöмдінсянь самолётъяс веськыда лэбавлісны и Ухтаö да Кировö. Лунтырнас вöчлісны 22 рейсöдз. Лэбавлісны тані и вертолётъяс.

Йöзыс, кодъяслы мойвиис на лэбавны юрсиктсянь, кöнкö, тöдöны на, кыдзи Мария Ефимовна да сылöн уджъёртъясыс колльöдлывлісны найöс самолётöдз либö вочаавлісны бöрсö локтігöн. И найö пыр мича, лöз паськöмаöсь, кыпыд нюмаöсь, шаня сёрниаöсь. И сы вылö видзöдтöг, ывлаас зэрö кöть шляча, турöбалö кöть веж кöдзыд. Торйöн нин тöвнас турöбалігöн налы ковмыліс самолёт лэбалан эрд вылö петны лым пыйті собалöмöн, ветлысьясöс кöть груз вочаалігöн. Быдторйыс пö лоліс. Йöзыс пыр вöлі уна. Лёк поводдя дырйи, овліс, самолёт эз кыпöдчыв некымын лунöдз. Йöз пукалісны, майшасисны, кор нин лэбöдасны найöс.
– Миянлы, диспетчеръясыдлы, коліс лоны и психологъясöн, мед кужны бурöдны да ышöдны йöзсö татшöм здукъясас, – водзö висьтасис Мария Ефимовна. – Сьöлöм доймö вöлі Канаваса челядь вöсна, кодъяс олісны да велöдчисны Кулöмдінын. Найöс гортаныс самолётöн мöдöда вöлі да звöнитлывла сэтчöс аэропортса диспетчерлы, тöдмавны, кыдзи воисны. Быд ветлысьмунысь вöсна майшöг босьтліс, мед ас кадö мöдöдны найöс коланаинö да мед бура на воöдчисны.

Эз öд весьшöрö сы мында во уджалöмöн сы вылö йöзсянь эз вöв весиг öти элясьöм. Районса олысьяс унаöн эз на вунöдны сійöс, пыдди пуктöны, паныдасьліганыс бур кывйöн казьтывлöны сійö кадсö. Мария Ефимовна шоныд кывъясöн висьталіс и уджъёртъяс йылысь, кодъяскöд зілис уна во. Шойччöг вылö петöм бöрас дыр на сьöлöмас кутіс уджсö и найöс, кыліс, мый пыр мыйкö эз тырмы. Öні на тшупöда пассö ыдждöдлігас матыссаясыслы висьталіс, мый сійö зэв шуда морт: сылöн вöлі радейтана удж, сьöлöм русö кыпöдöны со радейтана жö Радим пиыс Валентина гöтырыскöд, Наталья да Катерина внучкаясыс да Антон внукыс. Мый пö нöшта и колö – сöмын бур дзоньвидзалун да матыссаясыслöн мед вöлі тыр-бур олöм. Чужан лун пасйигас буретш тайöс и сиисны рöдвужыс да ветеранъяслöн Кулöмдінса котырöн веськöдлысь Валентина Петровна Нестеренко, коді Мария Ефимовнаöс чолöмаліс «Кулöмдін» овмöдчöминлöн администрацияöн веськöдлысьöс вежысь В.П.Нестеров, ветеранъяслöн районса котырöн веськöдлысь Е.А.Сазанович да олöмаяс нимъяссянь да сетіс козинъяс. Чолöмалан кывъяс да козин вичмисны и М.Е.Паршуковасянь.
Галина Нестерова.
Снимок гижысьлöн.