— Олöма йöзыд шаньöсь да сибыдöсь. Накöд колö сёрнитны, юксьыны посёлокын лоöмторъясöн, кывзыны майшасьöмнысö. Уна вонад ставныс менö тöдöны, да ас йöз кодьöсь нин. Менö пыр виччысьöны, и таысь нимкодь, — панiс сёрнисö Кебанъёльысь Татьяна Ивановна Логинова.

 Нывбаба социальнöй уджалысьöн зiльö 21 во нин. Велöдчис вурсьысьö да пырис уджавны йöзöс социальнöя доръян шöринö. Водзтi юрсиктын вöлi социальнöй вурсянiн, сэнi вурсьылiсны ичöт донöн районса олöма йöзлы да вермытöмъяслы. Татьяна Ивановна локтiс медводдзаяс лыдын да нималiс бур уджöн. Вурсянiн тупкысьöм бöрын зiлис Кебанъёльса профилакторийын. Сiйö сиптысис, да вуджис социальнöй уджалысьö. Öнi Татьяна Ивановналöн сойборд улын öкмыс морт.

 Асывсяньыс пыралö на дорö, юасьö мый ньöбны лавкаысь. Гожöмнас ветлöдлö велосипедöн, тадзи артмö öдйöджык кытшовтны олöма йöзöс. Локтöмсянь медводз юасьö дзоньвидзалуннысö да мерайтö давление. Бурдöдысьяслöн тшöктöм серти сетö лекарство, найöс ньöбны волывлö юрсиктöдз. Колiгöн пöль-пöчьясöс колльöдö бурдöдчанiнö, лэччöдлö и юркарöдз.
Социальнöй уджалысьяс могмöдны олöма да вермытöмъясöс сёян-юанöн, пыртöны пес-ва, тöлын весалöны лым, мыськöны джодж, кодлыкö да пусьöны, тшöктасны кö, отсыштасны град йöрын.

Водзтi Татьяна Ивановна ва ваялiс ылiсянь, вöлi сьöкыд, да и мунiс уна кад. Талун уналöн локтö гортöдзныс, тайö ёна кокньöдö. Пывсян лунъясö ань отсасьö тшöтш мыссьыны. Вöчö ставсö, мед öткöн олысьяс кылiсны асьнысö коланаöн, мед нинöм оз жугыльт налысь олöмсö.
Татьяна Чувьюрова.
Снимок Татьяна Логиновалöн.