Бур тöдсаяс

Уна аддзысьлöм вöлi ветеранъяслöн ыджыд чукöртчылöм вылын, да окота лои гижыштны та йылысь. Öтияскöд паныдасим 2018-öд воын Кировса санаторийын. Лоим зэв бур тöдсаясöн. Мöдъяскöд öтув ворсiм «Олимпик» ёнмöдчанiнын пионерболöн. Коймöдъяскöд тöдмасим гажъяс вылын петкöдчигъясöн. Либö Ручö волiсны сьывны-йöктыны, либö ми асьным ветлiм.
Татьяна Анатольевна Кузнецовакöд тöдсаöсь Кировсянь. Звöнитчам, варгам уна во нин. И со таво аддзысим «Мишкин лес» шойччанiнын. Нывбаба локтiс Леонид Анатольевич верöсыскöд. Пыр и пысаси мича гöрд футболкаа да сэтшöм жö рöма шляпаа гозъя дорö. Татьяна Анатольевна сёрнитö лöня, лабутнöя, оз гораа, но зэв серамбана. Пыр мыйкö да мыйкö вылö и серöктас. Кори висьтыштны, кыдзи гозъя тöдмасисны, олöны-вылöны, öд öтлаын нелямынöд во нин. Сёрнитiм. Леонид Анатольевичлöн гöтырыс сералiгмоз и висьтасис.
Татьяна Анатольевна чужис Дёма грездын. Бать-мамыслöн вöлi вит чоя-вока. Дасöд класс помалöм бöрын мунiс Выльгортса видз-му овмöс техникумö. Велöдчис бухгалтерö. Уджалiс госпромхозын, сэсся совхозын, а кор сiйö бырис — зiлис сиктсöветын кызь во на. Верöсыскöд тöдмасисны Дёмаын. Татьяналы муртса 16 арöс вöлi. Леонид Анатольевичлы 22 арöс. Нывка «Вычегодскöй» госпромхозсянь локтiс пуктыны турун. Сэки и воис сьöлöм вылас том зонлы. Аскоддьöмъясыдлы уджас некодлы эз сетчы, юртö вöвнад кыскалö, панласигад зонъясысь оз кольччы.
Леонид Анатольевич Донысь. Воис госпромхозö уджавны охотоведöн. Татьяна шуö, велöдчигöн пö и öтлаасим. Улыс Вочö и кыпöдiсны ас керка, чужтiсны да быдтiсны кык пиöс. Ыдждыс, Анатолий, уджалö велöдысьöн Одыб сиктын. Ичöтыс, Вячеслав, геодезистöн, ветлöдлö вахтаöн.
Гозъя век олiсны скöтöн. Öнi на мöскаöсь. Верöс кыйö-лыйö, гортаныс век асланыс чери-яй. Ёна вотчöны. Тадз и олöны-вылöны.
Таво Татьяна Анатольевна лоис Воч сиктса ветеранъяслöн сöветöн веськöдлысьöн. Таво медводдзаысь на гозъя воисны «Мишкин лес» шойччанiнö. Öтув мунiсны сiдз шусяна «семьялöн туй кузя». Öтлаын и чери кыйисны, петiсны ёна кöрталöм кöвъяс пиысь, лыйсисны «воздушкаöн», кыссисны труба сямаöд, беддьö лыйлiсны кольчаяс, а помас юисны чöскыд ырöш да окасисны турун вылын. Ставсö вöчисны öтув да дружнöя. Эз öд прöста Е.Д.Кузнецова кывкöртав: «Медся бура лыйсисны, быд пасö веськалiсны Шип гозъя». Кысь пö татшöм овыс? А сэсся, кор тöд-малiсны, мый тайö абу ов, а «Шустрые и Проворные» вочсалöн девизыс, ваксим да ваксим. А ми пö Кузнецовъяс, шуисны гозъя.
Татшöм йöзыскöд орччöн и олöмыс кажитчö кокниöн. Зэв нимкодь, мый и ылi Воч сиктын эмöсь тöлка, шань да зiль тöдсаяс, кыдз Татьяна да Леонид. Став бурсö тiянлы, Кузнецов семья!
Екатерина Ульнырова.
Снимок Кузнецовъяслöн.
Комментарии: