Том боечлöн тöлысся курс, и пыр жö боевöй ротаö. Тадзи пансис служитан кадыс Кулöмдiнысь Роман Михайлович Рассыхаевлöн.
Армияö босьтiсны 2008–öд воын, веськалiс Псковö 104–öд гвардиялöн парашютöн чеччалысьяслöн да десантникъслöн полкö, кытысь 2000–öд воын Чечняса гöраясын боевикъяскöд водзсасигöн юрсö пуктiс квайтöд ротаса 84 десантник. Стройöн ветлöм, автомат разьöм да чукöртöм, лунын и войын лыйсьöм, парашютöн чеччалöм… Медводз тöдмöдiсны парашютлöн тэчасногöн да сыöн вöдитчанногöн. Плац вылын вышка, сэнi карусель сяма, кытшын öшалiгöн велöдiсны веськöдлыны парашютöн. Чеччалiсны и неыджыд мыльксянь, метра вылнаын самолётлöн муляжсянь, водзö кык судта керка джуджа сiдз шусяна «крокодилсянь».

– Февральсянь июнь панасöдз вöлiсны ыджыд велöдчöмъяс. Нуисны военнöй аэродромö. Олiм палаткаясын, узим наръяс вылын, ломтiм пач, танi жö и мыссим. Медводдзаысьсö чеччыштiм АН-2 самолётсянь 800 метра вылнасянь, мöдысьсö 300 метра вылнасянь нин, мед муö воöмöн öдйö уськöдчыны тышö. Лэбалiм и ыджыд ИЛ-76 самолётöн, чеччалiм 300-400 метра вылнасянь. Дзоля самолётын кö вöлiм 8 морт, ыджыдас 100 сайö нин. Мукöдыскöд орччöн и лэччан му вылас. Сынöдын зэв бура кылö ставыс, да горзылiм öта-мöдлы, парашютсö веськöдны шуйгаладорас либö веськыдладорас, мед эг пысасьöй öта-мöд дораным. Овлiс, мый кодкö да веськавлiс да исковтiс орчча парашютлöн купол кузя. Ме вöлi инженер-сапёрнöй ротаын. Самолётсянь шыбитлiсны корсьны либö пуктавны минаяс. Велöдiсны, котрöдлiсны, мед ми быд здукö вöлiм дасьöсь дорйыны Айму. Чолöмала кельыдлöз берет новлысьясöс праздникöн, сиа налы став бурсö, – сёрнитiс, служитан кадас бергöдчылiс Роман Михайлович.

Том морт 15 во нин уджалö ГАИ-лöн районса юкöнын. Туйяс вывтi лючки ветлöм кузя старшöй госинсперктор. Август 2–öд лунö семьяыскöд мöдöдчö Кöрткерöсö, кытчö десантникъяс чукöртчасны республика пасьтаысь. Лоасны вермасьöмъяс, окотитысьяс чеччыштасны парашютöн, ворсöмъясöн шымыртасны и челядьнысö.
Марина Дадашова.
Снимок Ксения Рассыхаевалöн.