Менам пöль Михаил Алексеевич Ефремов служитiс-тышкасис Афганистанын.
1979–öд вося апрельын сiйöс босьтiсны армияö, служитiс Белоруссияын Витебскса сынöд десант дивизияын. Вöлi боевöй машинаса водительöн.

Сiйö жö вося декабрын ставнысö кыпöдiсны тревога серти да самолётöн лэбöдiсны Саратов обласьтö. Танi бара жö лэптiсны боевöй тревога серти, да лэбисны нин Афганистанö. Салдатъяс эз тöдны, кытчö найöс нуöны. Декабр 30–öд лунö батальоныс пырис Кабулö нин. Босьтны вöрöглысь полк – тайö вöлi салдатъяслöн медводдза мог. Тайö тышын юрсö пуктiс кык салдат. Миян зонъясöс выльысь велöдiсны водзсасьны-тышкасьны, но сöмын гöраяс вылын нин. Дерт, сюрлiс тшыгъялöм, эз тöдлыны кампет-печенньö. Ковмылiс сёйны весиг бакшасьöм нин нянь. Юкмöсысь ва юны эз позь, лёк вöчысьяс ваас кисьтлiсны пагöдантор. Пöтмöн юлiсны гöраяссянь лэччысь юясысь. Сэнi жö кыйлiсны чери. Вöрöг пуктавлiс минаяс. И öтчыд пöльö пехоталöн боевöй машинаöн мунiгöн веськалiс мина вылö, пельыс сьöдмис, лёкысь жувгис юрыс. Бур, мый некытi эз чег, эз доймав. Но госпитальын куйлiс сöмын куим лун. 1980–öд вося декабр 23–öд лунö, аслас чужан лунö, боевöй задание дырйи муртса эз пöгибнит. Боевöй машинаыслöн тресьмунiс гусеничаыс, да техникаыс öшйис джуджыд кыр дорышын. Öтлаын служитысьяс дорйисны, видзчысьöмöн пöльöс перйисны машинасьыс.

Миян салдатъяс эз кутны йитöд аулъясын олысьяскöд, налысь эз босьтлыны ва да сёян. Эз позь, вермисны отравитны. Аньясыс ветлiсны чужöм сайöдысь паранджаöн. Öтчыд миян салдатъяс кыйисны Америкаса офицерöс, кодi ас вылас кышалiс тайö паськöмсö да кöсйис пышйыны, но эз артмы.

Михаил Алексеевич пöльöй вöлi старшöй водительöн, ротаса механикöн, кывкутiс 11 машина вöсна. Афганистанысь петiс 1981–öд вося май 25–öд лунö. Сiйöс пасйисны уна наградаöн.
Екатерина Ефремова.
Ярашъюса школа,
Снимок Михаил Ефремовлöн.