Важöн кодь нин кыпöдлöм керка, пывсян да мукöд стрöйба, а видзöдсьöны, быттьö выльöсь на да и мича. Öнi тай ставсö позьö вöчны, мед сöмын вöлiс кöсйöм да сям. Найöс выльмöдны босьтчис Озъягысь Эделина Романовна Чувьюрова.

– Роман Анатольевич батьöй аслас уджысь öтдор зiлис и асшöр уджалысь дорын, шыльöдiс, мавтiс керка да мукöд стрöйбалысь керъяс-пöвъяс, вöчис пытшкöсса и ортсыса уджъяс. И тайö лоис сылöн ловкыпöданторйöн. Сыкöд орччöн корсюрö вöлi и ме, сюся видзöдi, а сэсся босьтчи отсасьны. Горт дорын зiлигöн миянысь эз кольччы и Галина Владимировна мамöй. Уджöн могмöдан шöринлöн районса юкöнын пасйысигöн вöзйисны «Социальнöй контракт» государстволöн программа серти петны ас нянь вылö. Гортын сёрнитiм, да шуи видлыны, – сёрнитiс Эделина Романовна.

Батьыскöд и лöсьöдiсны бизнес-план, гижисны, кутшöм инструментъяс да мый нöшта колö, пасйисны и талун тайö уджлысь коланлун йылысь. Районын керкаяс «быдмöны» тшак моз, да эскöны, шыöдчысьыс лоас тырмымöн. Пасйысис вот инспекцияын кыдз самозанятöй да быд тöлысь кутас вештыны вот.
Карö ветлöмöн ньöбисны тайö уджыслы лöсялана пылесос. Сiйöн кер костъясысь босьтöны бус да ёг. Шлифуйтан машина, сiйöн шыльöдöны кер, пöвъяс. Шлифуйтанлы дискъяс, кисточкаяс, уджалан паськöм, öчки, кузь пос да мукöд коланатор. Краскасö да колана сорасъяс шыöдчысьыс босьтö ачыс, сiйö жö бöрйö рöм.

– Шыльöдöны да мавтöны öд оз сöмын мичлун вöсна. Сиськалöм, рочöн кö воска, краскаыс йиджö, да керйыс дырджык олö. Озджык сiсьмы, сiдзкö, нюжöдам керка-пывсянъяслысь нэм. Мавтiгöн мында гаг петö керйысь. Артмö, видзам и пулы пакöсьт вöчысьясысь. Гожöмын кö унджык ывласа, тöлын лоасны пытшкöс уджъяс. И йöрыд, и сиктыд выльмöдöм стрöйбаяснад лоасны тöдчымöн гажаöн да югыдöн. Эмöсь нин шыöдчысьяс, сос пуджöмöн босьтча уджö, – кывкöртiс Эделина Романовна.
Марина Дадашова.
Снимок Галина Мальцевалöн.