Найö мудзисны, окота котралыштны ывлаын, ворсны ёртъясыскöд. Каникулъяс дырйи ныв-зон кольöны гырысь йöзлöн дöзьöртöг. Кыдзи позьö отсавны налы коллявны прöст кадсö, мед бать-мам эз повны кольны найöс öтнаныссö?
Медшöр индöдыс — висьталöй челядьлы, кыдзи видзчысьöмöн овны гортын да ывлаын.
Керкаын быдöнлöн эмöсь электроприборъяс, ва да газ плита. Ныв-зон вермасны доймавны и пöсь веркöсъясö да пызан-улöсö. Велöдöй найöс вöчны ставсö, мый кужанныд асьныд — шонтыны сёян, вундыны нянь. Велöдöй найöс кужöмöн вöдитчыны электрическöй чайникöн, микроволновöй пачöн, электро да газ плитаöн. Челядьлы колö гöгöрвоины, кыдзи найö уджалöны да мыйла колö кужöмöн вöдитчыны татшöм техниканас. А электролобзик, дрель да мукöдтор, кодъяс уджалöны бисянь, колö ылöджык сайöдны.
Оз позь сюйны мый веськалö розеткаö, а сiдз жö кольны би проводкöд йитлöм электроприборъяс. Лекарство да бытöвöй химия колö видзны челядьысь гуся инын.
Весиг сэк, кор челядь бура тöдöны колана индöдъяс да дасьöсь овны кутшöмкö кад ас кежаныс, бать-мамлы колö кольны тыдалана инö телепон. А суас кö мог, öдйö звöнитны полицияяö, бурдöдчанiнö либö бикöд водзсасян овмöсö. Сотовöй телепонлöн нумерыс 112.
Колö тöдны телепон нумеръяс и суседъяслысь. Отсöгсö вермасны сетны и найö.
Бать-мамлы оз ков звöнитны быд час джын мысти челядьлы. Бурджык лоö, вочанныд кö тадзи öтчыд либö кыкысь. А нöшта мед каганыд ачыс юöртö, мый сылöн ставыс бур. Татшöмног кö велöданныд, сiйö öдйöджык гöгöрвоас, мый тi сылы эсканыд.
Каникулъяс дырйи челядь радейтöны гуляйтны. Колö тöдны – ывлаын вермас лоны уна виччысьтöмтор. Велöдöй нйöс, мый оз позь матыстчыны тöдтöм йöз дорö, оз позь налысь нинöм босьтны (яблöк, кампет да мукӧд чöскыдтор). Оз позь пуксьыны йöз машинаö, мунны накöд кытчöкö. Колö гöгöрвоöдны, мыйла тадзи оз позь. Бать-мамлы колö корсьны сэтшöм кывъяс, мед челядь гöгöрвоасны да оз ылавны лёк йöзлöн мудеритöмö.
Ывлаö петтöдз на налы колö висьтавны, дыр-ö вермасны гуляйтны. Ылалас кö да вунöдчас, мам-батьлы колö йитчыны телепон пыр. Дырджык гуляйтöмысь чорыда видны оз ков.

Биысь видзчысян да войтырöс доръян
республикаса веськöдланiн