Петны дасьöсь кöть кор
Локтан воын биысь видзчысян Россияса службалы тырас 365 во. 1649 вося апрель 30 лунö сар Алексей Михайлович кырымалiс бикöд водзсасян служба котыртöм йылысь индöд. Русь вылын медводдзаысь лöсьöдiсны биысь видзчысьöм кузя правилöяс. 1918 вося апрель 18 лунö В.И.Ленин кырымалiс «Бикöд тышкасьöм могысь мераяс лöсьöдöм йылысь» декрет. 1999 воöдз кусöдчысьяс апрель 18 лун пасйисны кыдз уджлысь праздник. 1999 воын Б.Н.Ельцин кырымалiс индöд, код серти апрель 30 лун кутiсны пасйыны кыдз биысь видзчысян Россияса службалысь лун. Водзтi кусöдчысьяслöн котыр пырис пытшкöсса делöяс кузя министерствоö, а 2001 восянь — видзчысьтöм лоöмторъяс кузя министерствоö.
Асланыс удж йылысь висьталiс биысь доръян 7-öд отрядса начальник Олег Фёдорович Зинович:
— Талун районын биысь видзöны «Коми республикаын биысь доръян федерация службаса» 7-öд отрядлöн 71 номера часьт, Коми республикаын биысь доръян службалöн 14-öд отряд, кытчö пырöны Помöсдiнса, Великопольеса, Зимстанса да Югыдъягса часьтъяс. Кусöдчан постъяс эмöсь Керчомъяын, Тимшерын да Белоборскын. Эмöсь и ас окота серти кусöдчысьяслöн котыръяс. На пиысь «Комилесбизнеслöн» овмöсас эм кусöдчан техника. Татшöм котыръясöс велöдны волiсны главнöй управлениелöн велöдан шöринысь специалистъяс. Таво котыръяс отсалiсны кусöдны кöкъямыс öзйылöм. Бикöд тышкасьöны оз сöмын ас сиктын, но и петавлöны орччаясö. Кусöдчан машинаяс эмöсь Парчын, Мысын, Ручын, Кебанъёльын, Лопъювадын. Мукöдлаын эмöсь мотопомпаяс.
Кольöм воын куим да джын тöлысьöн öзйылiс 29-ысь, таво — 27-ысь. Кольöм воын кö кусöдчысьяс воöдчисны öзйöминö шöркодя 10 минутöн, то таво 6-öн. Ылiджык сиктö воöдчисны унджык кадöн, а Кулöмдiнын некымын минут мысти кусöдчисны нин. Öзйöм кусöдiм шöркодя 12 минутöн. Видзим сотчöмысь 11 миллион 265 сюрс шайт дон эмбур, биысь петкöдiм 27 мортöс. Кольöм вося медводдза кварталын сотчис куим морт, таво кык. Код юрöн куритöны, кусöдтöм чигаркаöн унмовсьöны восьпасьын. Тшöкыда овлö, мый керкаяс да мукöдтор кыпöдöны да вöчöны пытшкöсса уджъяс оз специалистъяс да оз колананог вöчны пач да нюжöдны би провод. Та вöсна сотчöны дзик выль стрöйбаяс.
Кусöдчысьяс дорйöны эмбур, йöзлысь олöм, помöдз сетöны асьнысö делöлы. Найö öтарö велöдчöны, петкöдчöны ордйысьöмъясын да конкурсъясын. Республикаын медбуръяс лыдын Помöсдiнса кусöдчысьяс. Кольöм воын петкöдчисны КВН ворсöмын. Таво медводдзаысь пырöдчим «МЧС-са мисс» конкурсö. Диспетчер Анна Мисюрова лоис коймöдöн. Лыжиöн котралысь Фёдор Нестеров нималö и районын, и республикаын. Медся тэрыбöн лоис видзчысьтöм лоöмторъяс кузя министерствоöн котыртöм ордйысьöмын Уфа карын. Кусöдчысьяслöн 71 часьт вöсна котöртiс Емваын да воис медводз. Фёдор Нестеров пырö республикаса медшöр управлениелöн öтувъя котырö, петкöдчö Россияса ордйысьöмъясын. Сiйö да пауэрлифтинг кузя спортса мастер Михаил Липин ордйысьöны и район вöсна. Уна кусöдчысь петкöдчö районса мукöд ордйысьöмын.
2014 воöдз кусöдчан часьтъяс восьтам Немдiнын, Озъягын, Ягкöджын, Ручын. Немдiнын да Ручын колö кыпöдны стрöйба. Лоас дась, могмöдам машинаöн да мукöд коланторйöн. Район пасьта 8 сикт-посёлокын смена дырйи уджалö 25 морт. Кулöмдiнын да Помöсдiнын быд здукö дась ва тыра кык машина, Великопольеын, Зимстанын, Югыдъягын, Тимшерын, Керчомъяын да Белоборскын — öти. Быд лун удж бöрын гортсянь дась котöртны 25 морт.
Ми тшöкыда ветлам велöдан учреждениеясö, челядь волöны и кусöдчысьяслöн часьтъясö. Найöс öтарö велöдам.
Сöвмисны, содiсны кусöдчысьяслöн часьтъяс. Сэкжö олысьяс оз пыр уськöдчыны водзсасьны бикöд, а виччысьöны кусöдчысьясöс, кöть быд мортлöн мог ― мездыны-дорйыны биысь да мукöд неминучаясысь.
Бöркывйын шуа, мый ог вунöдöй ветеранъясöс, кодъяс ас кадö пуктiсны ыджыд пай кусöдчан служба сöвмöдöмö, уналысь дорйисны олöм да эмбур. Сэтшöмöсь жö и öнiя уджалысьяс. Ставнысö чолöмала асланыс удж кузя праздникöн.