Мöвпыс, код йылысь кöсъя юксьыны газет лыддьысьяскöд, воис Пожöгын неважöн юргöм «Коми кыв дорö муслунöн» фестиваль бöрын. Ыджыд гажыслысь медшöр могсö тай со кутшöм кывъясöн донъялiсны-гартыштiсны: «…мед юргас-олас чужан кыв, и паськыд лоö сылöн сыв!». Сы водзвылын Пожöгын жö нуöдiсны «Арся коми рытпук». Чукöстiсны йöзсö эз сукар кодь чорыд кывъясöн, а быттьö выйöн мавтыштöм небыд кöвдум вöзйисны: «…уна выльтор тöдмалам, кыам-печкам, гольгыштам, уджалiгмоз больгыштам, гажсьыс бурсö курыштам, медым сьöлöм бурмыштас. Кыпыд ру да мича нюм аскöд ваям!»

Майбыр, кутшöм мича да шоныд коми кывйыд!
Эжва йывса сикт-грездъяс эз на дзикöдз рочмыны, но кежисны сыланьö. Неважöн тöдса гозъякöд аддзысьлi, пöль-пöчöн шуысьыс накöд жö вöлi. Ас костын сёрнитiм комиöн, кагаыскöд шыасисны рочöн. Мыждiсны, мый челядь рочмöны кагаясöс видзанiнсянь нин, сэсся водзö – школаын, сы вöсна мый сэнi коми кыв да литература велöдöны оз важ моз пыдiсянь.

Рочмам. Тайö тыдалö тшöтш коми газет-журнал разалöмын. Республика тшупöда коми журналгазетыс некымын и коли, и налöн лыддьысьысьыс абу уна. 730–öдз чинiс «Парма горлöн» тиражыс, кöть дас во сайын сiйöс судзöдiсны 7 сюрсöдз. А вот колис на ошйысянтор: Коми му пасьта став районкаяс лыдын сöмын öтнас «Парма гор» петö коми кыв вылын. Судзöдöй да лыддьöй ёртнытö, коми кыввора газет.

Вöзъя сюртчыны тшöтш «Выль вося козин» акцияö да отсыштны асланым газетлы сöвмыны водзö. Лавкаясысь выль вося козин корсьöм пыдди ветлöй пошта вылö да судзöдöй «Парма горнымöс» аслыныд да тшöтш бать-мамыдлы либö пыдди пуктана матысса мортлы. Ме тадзи вöчи, да локтан во газет кутас воны воклöн семьяö.

Нина Буткина, журналист-ветеран.