Кулöмдінысь Игорь Денисов школа помалöм бöрас стöча эз на тöд, кутшöм туйвизьö сетчыны, кутшöм профессия бöрйыны да мед сійö вöлі сьöлöм сертиыс. Сы вöсна кад кежлö пыраліс уджыштны лавкаö. Öтчыд Татьяна Николаевна мамыс чуйдіс сылы, мый йöзöс уджöн могмöдан шöринсянь карын велöдöны шырсьысьö, вöзйис велöдчыны да видлыны пырöдчыны тайö уджас. Пиыс эз и бöрыньт, сылы лючки тöдса тайö уджыс, öд мамыс уна во нин зільö тайö специальносьт сертиыс, тшапитöдö йöзöс. Сы дорö волігöн нимкодясьлö вöлі, кутшöм кокниа да пелькыда артмö сылöн, йöзыс мунлісны ёна мичмöдчöмöн да пöся аттьöалöмöн.

Игорь шырсьысьö велöдчис Сыктывкарса сервис да связь колледжын. Уджавны босьтчис «Эйфория» мичмöдчанінын, кöні медводдза кадас отсасис да велöдіс на Татьяна Николаевна мамыс. Том морт сюркняліс аслыс быд туйдöм. Но та вылын эз на сувт, водзö велöдчис Сыктывкарса «ИНОАР академия» шöринын барберö. Коді сэтшöм барберыс, гашкö, уналы абу на тöдса. Сійö могмöдö сöмын айловъясöс – шырö, лöсьöдö либö бритö ус-тош, тшапитöдö найöс. И, колö шуны, татшöм специалистыс юрсиктын да и районын, кöнкö, медводдза на.

– Уджыс меным сьöлöм серти, – нимкодьпырысь висьталіс Игорь. – Гашкö, сійöн, мый ме творческöй морт, аслам киясöн радейта вöчны мичлун. И ог сöмын ас гöгöрысь, но и йöзлы. Уджавны босьтчигöн видлі шырны аньясöс и айловъясöс, но сэсся шуи сувтны öти туйвизьö – тшапитны сöмын мужичöйясöс. Найöс могмöдігöн öд сідзжö позьö сöвмöдны творчествотö: видзöдлыны да шырны, кодлы кыдзи лöсялö, дерт, налы водзвыв вöзйöмöн. Овлö, и асьныс чуйдöны, кыдзи налы сьöлöм сертиныс да кыдзи велалісны новлыны юрсисö. Шыра челядьöс и верстьööс. Выль сикас услуга, ус-тош лöсьöдöм ли бритöм кузя, шыöдчылöны, дерт, оз на сэтшöм тшöкыда, тыдалö, йöзыс оз на тöдны сы йылысь, волöны сöмын том йöз. Но эмöсь нин пыр кадся клиентъяс.

Игорьлöн шырсьыны босьтчöмсянь колис матö во. А тавося февральсянь сійö социальнöй контракт кырымалöмöн петіс нин ас нянь вылö. Государстволöн индöм программа серти вичмöдöм 350 сюрс шайт вылö ньöбис ассьыс удж восьтöм могысь став коланасö, ножичьяссянь босьтöмöн гырысьджык оборудованиеöдз. Том морт сьöлöмсяньыс зільöмöн кыпöдö ассьыс сям. А мöд ногыс и оз вермы лöны, öд шырсьыны-мичмöдчыны модаыс вежсьö лунысь лун, сідзкö, колö восьлавны олöмыскöд тшöтш, тöдчöдіс сійö. Öні сійö чöжöм тöдöмлунъяснас вермö юксьыны нин мамыскöд. Водзö вылö сійö нинöм на оз артав, лыддьö, мый уджас медводз колö зумыда сувтны кок йылас, водзö ёнмöдны-паськöдны кужöмлунсö да сямсö. А сэсся петкöдлас олöмыс, мый вöчны.
Галина Нестерова.
Снимок гижысьлöн.