Галина Васильевна Расова Руч сиктса олысь, кöть чужлiс Карелиялöн Повенец посёлокын. Олöма аньлы мича арся лунö тырис 85 арöс. Чолöмавны ветлiм Анна Ильинична Адамовакöд.
Чоййыв помын сулалö мича керка, пуяс, градъяс – ставыс эм. Öнi Галина Васильевна олö öтнас, Иван Егорович верöсыс кувсьылiс. Кор пуксим пызан сайö, ме юасьыштi мыйсюрö.

– Ручын помалi сизим класс. Сэсся уджалi Озъягын медводз садйын нянечкаöн, а сэсся 15 во увйыси лесопунктас. Öти созыв бöрйылiсны сиктса депутатöн. Сы бöрын бöр верöскöд локтiм Ручö, пыри колхозö лысьтысьысьöн и сэнi, öтилаын, уджалi 21 во, – казьтывлiс ань.

И татчö Анна Ильинична содтiс, зэв пö пельк, помöдз вöчлiс став уджсö да вöлисти мунлiс гортас. Век вöлiс медбур лысьтысьысьяс лыдын. Бур уджысь уна почёт грамота, медальяс, киад новлан часi, мича шебрас, шоныд халат. Карад пö весиг гозмöдысь лэччöдлiсны, кыдз передöвикöс. Галина Васильевна казьтывлiс, кор пö Анна Ильинична босьтчис веськöдлыны профкомö пырысьяслöн котырöн (кывкутiс 8 во), котыртлiс зэв уна социалистическöй ордйысьöм. Ог пö и вöлi тöдлöй, кыдз лысьтысигад локтасны да сорт тöдмалöм могысь босьтасны йöв. Сэсся пö мöдысь, да-й коймöдысь. Менам пö век вöлi первой сорта йöв.

Юалi, мися, кытчöкö курортъясад ветлывлiн эн. Галина Васильевна нюмъялö. Иван Егорович верöсöй пö нулiс Юрмалаö, Рига карын пö тайö курортыс. Ёна пö и кажитчис. Зэв унатор ньöбим, уналаö ветлiм. Но рочьястö пö оз ёна радейтны, тöдчö пö сёрни сертиныс. Сэсся со пö öнi, дзик юбилей бöрын, мöдöдöны Максаковкаö. Меным пö зэв нимкодь. Öтчыд пö ветлi нин, кажитчис ёна.

Галина Васильевна война кадся челядьдыра. Ме пö шуда морт, челядь шаньöсь, почитайтöны менö. Верöскöд пö лöсьöдiм кык пи да нылöс. Ставныс ас сиктын, куимнанныс лэптiсны керка, лöсьöдiсны челядь. Со тай öнi вит внуквнучка да öкмыс правнук, кутшöм пö озыр ме.

Чай юöм бöрад олöмаяслöн районса да Ручса котыръяссянь сетiм козинъяс. Сиим уна шуд, дзоньвидзалун, матыссаяссянь тöждысьöм, сиктсаяссянь пыдди пуктöм.
Галина Васильевна аттьöалiс волöмысь, пыравлöй пö век, ме гортын да пöсь чайыд век лоас. Ассянь содта, мый Галина Васильевна öнi на зэв статя, енсыкöдкодь збодер, синъясыс югъялöны, кöть абу ёна варов, но зэв шань ань.
Екатерина Ульнырова.
Гижысьлöн снимок вылын: Анна Ильинична Адамовада Галина Васильевна Расова.