Водительлöн уджыс абу кокни, тайöс лючки, кöнкö, тöдöны найö, кодъяс пыр туйынöсь, лунын кöть войын, и ветлöны оз шойччöм могысь, а сы вöсна мый корö уджныс. Матö 30 во нин руль сайын и Кулöмдінысь Дмитрий Иванович Попов. Ачыс сійö ылі вöр посёлокысь, Белоборскысь. Сэтчöс школаын öкмыс класс помалöм бöрын велöдчис ДОСААФ-лöн Сыктывкарса юкöнын водительö. Босьтісны армияö. Служитіс Ярославльын милицияса батальонлöн торъя отрядын. Сэсся веськаліс Чечняö, кöні машинаöн новлöдлiс ломтас-мавтас. Тышъяс пыр кöть лöнь кадö коліс нуны сійöс индöминö. И сідз куим да джын тöлысь чöж быд сьöкыдсö тöдлöмöн да вуджöдöмöн, кытчöдз эз помась Чечняса медводдза война. Гортас бергöдчöм бöрын кутшöмкö кад уджаліс Немдiнса леспромхозлöн Белоборскса лесопунктын трактористлы отсасьысьöн, пöрöдіс да чукöртіс вöр. «Д» категория вылö велöдчöм бöрын зілис автобус вылын, новлöдліс йöзöс. Гöтрасис да Югыдъягын олігас уджаліс улыс складын увйысьысьöн, гожöмнас вежліс автобусса водительясöс. Юрсиктö семьянас овны вуджöм бöрын кад кежлö пыраліс «Фора» котырö, автобусöн новлöдліс йöзöс. А сэсся вуджис кусöдчан часьтö. Медводз вöліс сідз шусяна оперативнöй водительöн, УАЗ-икöн новлöдліс часьтса веськöдлысьясöс. 2009–öд воын часьтыслöн тэчасног вежсьöм бöрас вуджöдісны сійöс боечö. Сыктывкарын МЧС-лöн тöдöмлунъяс босьтан шöринын куим тöлысь велöдчис кусöдчысьö. А сёрöнджык тані жö – водительö. И со 17 во нин сійö 19–öд номера кусöдчандоръян часьтын кусöдчан машинавывса водитель.

– Тайö кадöн мойвиліс веськавлыны быдсикас неминучаö, гырысь и посни öзйылöмъяс вылö, – висьталіс Дмитрий Иванович. – Медся ыджыдыс, буракö, вöліс уна во сайын Керчомъяын, кöні сотчис сиктсöветлöн керкаыс. Кусöдчим дас час рытсянь дас час асылöдз, войбыд шойччытöг. Водзті öзйылöмъясыс тшöкыда вöвлісны тулыснас, важ турун сотігöн, смена чöжöн бисö пöдтыны ковмыліс петавны некымынысьöдз. Уджалам сідзсö суткиясöн, быд караулын кöкъямыс мортöн. Пыр дасьöсь уськöдчыны быд чукöстöм вылö. Дась и техника. Быд öзйылöм вылö петкöдам кык кусöдчан машина. Эм нöшта и видзас (резервын) машина. Миян, водительяслöн, мог вайны кусöдчысьяслысь котырсö неминуча инö да могмöдны би пöдтан сорасъясöн, ваöн, оз кö тырмы, вайны сійöс содтöд ва видзанінъясысь.

Кусöдчысьяслöн, тшöтш и водительяслöн уджыс, гöгöрвоана, сьöкыд да кывкутана. И бытьысь мед найö вöліны ён дзоньвидзалунаöсь, повтöмöсь, став сьöкыдсö венны вермысьöсь. Оз весьшöрö налы матö быд вежон нуöдны тренировка, ки-кок песöмöн сöвмöдöны вын-эбöс. Куим вонас öтчыд велöдчöны, кыпöдöны сям. А водительяс куим вонас öтчыд жö нöшта сдайтöны туй вывті ветлан правилöяс да теория кузя экзаменъяс, медым тöдмавны, туйöны-оз найö уджавны кусöдчан машина вылын. Сідзкö, оз на быдöн кокниа веськав тайö удж вылас.
Галина Нестерова.
Снимок гижысьлöн.