Тимшерысь Иван Тимофеевич Паршуков зiль, быдторсö кужысь, уджач морт. Чужiс 1932-öд воын Мысын. Кöть таво пасйис öкмысдас арöс, а век на вöралö.

Чужанiнас велöдчис витöд классöдз, сы бöрын пырис уджавны «Выль олöм» колхозö.
Кызьöд нэм шöрын заводитiсны воссявны леспромхозъяс. Тимшерса леспромхозö и вайöдiс сэки олöмыс Иван Тимофеевичöс. Зiлис шоперöн, пуксьылiс кран вылö, ветлöдлiс тракторöн, уджалiс сöвтчан машинаöн, кыпалiс бригадир-механикöдз.
Öтлаасис кагаа нин нывбабакöд. Алексей писö дзолядырсяньыс быдтiс ассьыс моз. А сэсся чужисны нёльöн — Тамара, Светлана, Нэля да Николай. Гöтырыс кувсьылiс водз. Айловлы мöдысь усис аддзыны шуд, овмöдчис шань нывбабакöд. Олiсны öта-мöдöс пыдди пуктöмöн да гöгöрвоöмöн.
Чужöмсянь пармакöд ёртасьысь мужичöй нэмсö кыйсис-вöралiс да вотчис. Олöмын ыджыд туй вуджöмöн оз лэдзчысь аслас лов кыпöданаторйысь. Аслас тракторö пысалö ичöтик керка (будка), босьтö радио да кайö вöрö. Посёлокын нималö пыж да лямпа вöчысьöн. Эм аслас вöчасян-дзоньтасянiн, кытчö öнi на тшöкыда петавлö.
Уна вося бур уджсö Иван Тимофеевичлысь пасйöма юбилейнöй медальясöн, почёт грамотаясöн.
Январ 20-öд лунö гöгрöс пасöн чолöмалiсны тöждöн кытшалысь дас куим внук-внучка да кызь кык правнук, сиисны дзоньвидзалун да висьталiсны шоныд кывъяс. Олöма мортöс ыдждöдлiсны и Тимшерса юралысь Валентина Андреевна Белова да олöмаяслöн котырöн юрнуöдысь Галина Николаевна Паршукова, сетiсны козинъяс.
Татьяна Чувьюрова.
Снимок öтуввезйысь.