Олöмаяслöн Ручса котырöн юрнуöдысь Анна Ильинична Адамова чукöстлiс рытпукны Помöсдiн вожсаясöс. Кырныша, Бадьёльйыв, Помöсдiн да Скöрöдумса гöсьтъяскöд ывлаын асывсянь рытöдз гындысим, шегъясим, тöдöмлунöн вермасим «Поле чудес» ворсöмын, öтув пуктiм гаж. Сiйöс нуöдiс Надежда Михайловна Подюкова.
Со и öнi котрöдлiм карнанöн лым ведраяс, öта-мöднымöс кыскалiм ваннаын, öти лызь вылын мунiм куим мортöн. Ён да гажа котыръяс вöлiсны. Гöсьтъяс асьнысö нимтiсны «Кырнышъяс» нимöн, Ручса администрацияын уджалысьяс да гырысь классъясса велöдчысьяс öтувтчисны «Дружбаö», олöмаяслöн Ручса котырысь асьнысö ыдждöдлiсны «Орёлöн». Ставныс банйöмаöсь, синъяс öзйöны, сöмын чеччалöны да ышöдöны öта-мöднысö. Артмис миян «Дзоньвидзалунлöн туй». Культура керкаын тшака, тусьяса, капуста пöжасъясöн виччысисны нин Владимир Леонидович Трегубов да Ольга Дмитриевна Зезегова. Пöсь чай юöмöн лоим нöшта на ёнöсь да шудаöсь.

Шегъясигöн гöрдöдiсны плешъяс, ёна жуглiм юр «Поле чудес» вылын, зэв сьöлöмсянь ворсiм лотоысь.

«Сударушка» котыр гажсö восьтiс «Святый вечер» сьыланкывйöн. Медводдзаысь на йöктöмöн да кывбуръясöн сцена вылö петiсны муспозъяс: Юля Чаплыгина, Ирина да Алиса Поповаяс, Валентина Дмитриевна Холоповалöн кружокö ветлысьяс. Видзöдысьяс ёна кекöначасисны, весиг йöктiсны öтув. Гажыс öддзис, кор пырисны кöлядуйтысьяс да бурсиисны шыдöс коялöмöн.

Олöмаяслöн Кырнышаса котырöн юрнуöдысь Мария Егоровна Дёмина аттьöалiс Анна Ильиничнаöс тöдмасьны-аддзысьлыны-гöсьтитны корöмысь. Ошкис ас киöн вöчöмторъясысь, культура керкалысь пытшсö мичмöдöмысь. А сэсся тöдмöдiс аслас локтысь котырнас. Тайö Кырнышаысь Вера Семёновна Дёмина, Скöрöдумысь Ирина Валентиновна Пашнина да Нина Георгиевна Королёва, Помöсдiнысь Екатерина Анатольенва Игнатова да Бадьёльйылысь Нина Афанасьевна Уляшева. Öтув сьылiм да йöктiм сцена вылын. Ставныс мичаöсь, кужысьöсь, томöсь ловнаныс. Шуим ёртасьны водзö. Помöсдiн вожсаяс корисны и миянöс. А мый, чукöртчам да и тöвзьылам. Аддзысьлытöдз!
Екатерина Ульнырова.
Снимокъяс гижысьлöн.