Ноябр 11 лунö чукöртчылiсны райсöветса депутатъяс.
Сувтлiсны 19 видлалантор вылö. Медтöдчанаясыс — «Кулöмдiн» муниципальнöй районса администрацияöн веськöдлысьöс бöрйöм кузя конкурс нуöдöм, öткымын сиктъяс картаяс вылысь дзикöдз бырöдöм, öткымын овмöдчöминъяс вужвыйöн вежöм, «Кулöмдiн районса пыдди пуктана олысь» ним сетöм.
Сы вöсна мый райадминистрацияöн воддза веськöдлысь Д.А.Шатохин вуджис уджавны республикаса Госсöветö, районса депутатъяс декабр 11 лунö асланыс сессия вылын бöръясны выльöс. «Парма гор» газет йöзöдас сiйöс бöрйöм кузя конкурс. Та бöрын окотитысьяс вермасны вöзйыны асьнысö да сетны документъяс конкурслöн комиссияö.
Райсöветса депутатъяс вöзйисны «Пожöг», «Руч» да «Улыс Воч» овмöдчöминъяслы чукöртны колана документъяс, мед киритны административно-территориальнöй реестрысь Сьöдтыдiн, Лунпока да Дёма грездъяс. Талун тайö сиктъясын некод нин оз ов, абу туй. Республикаса правительство кö шуас тупкыны найöс, география картаяс вылысь вошас куим ним. Депутатъяс сiдзжö вöзйисны декабр 1 лунöдз нуöдны «Аныб», «Руч», «Дереваннöй», «Мыс», «Немдiн», «Парч», «Носим», «Кулöмдiн» овмöдчöминъясын овмöдчöминъяс вужвыйöн вежöм кузя йöзкост кывзöмъяс. Вöзйöны öтувтны «Аныб», «Руч» да «Дереваннöй» (административнöй шöринöн лоас «Руч»); «Мыс, «Немдiн» да «Парч» (административнöй шöрин — «Немдiн»), «Дзоль» да «Зимстан» (административнöй шöрин — «Зимстан»), «Носим» да «Кулöмдiн» (административнöй шöрин — «Кулöмдiн»).
Нимкодьторйöн лоис Кырнышаысь Михаил Васильевич Курочкинлы «Кулöмдiн районса пыдди пуктана олысь» ним сетöм. Михаил Васильевичöс тöдöны оз сöмын Помöсдiн вожын, но и районын кывкутысь, водзмöстчысь, чужанiн да вöр-ва вöсна тöждысьысь мортöн.