Ылалiн кö вöрын.

Комиын виччысьöны тшакалан кад. Унаöн гожся лунъястö радпырысь коллялöны вöр-ваын. Тшакалысьяс тайö пöраас вайöны уна тöжд мездысьяслы. Кыдзи кутны асьтö вöр-ваын да кыдзи петны вöрса невöляысь, та йылысь сёрнитам талун.

Дасьтысьöй вöрö мунтöдз. Бöрйöй кузь соска, кызджык дöрöм, сапöг, чышъян-шапка да быть яръюгыд рöмаöс. Висьтасьöй матыссаыдлы, кытчö мунанныд да кор воанныд. Нопъяд сюйöй нуръясянтор, пурт, истöг, компас, гут-гагйысь мазь, колана бурдöдчан зелля да зарадитöй сотöвöй телефон. Сотовöй йитöдыд быд во отсалö мездысьысьяслы петкöдны вöрысь ылалöм войтыр.

Вöрö пыртöдз компас отсöгöн тöдмалöй, кодарлань мунанныд, кöнi петан туйыд, видзöдöй, кöнi шондi. Вöртi мунiгöн гöгöр видзöдöй, казялöй чукля, джуджыд либö пöрöм пуяс, ыджыд рöвъяс, сотчöминъяс, мыръяс. Позяс и аслыд пуктавны пасъяс: керыштавны пулысь кырсьсö, чегъявны увъяс. Тадз позяс аддзыны гортлань петан туйтö.

Унаöн чайтöны, мый бур тшаклöн кöрыс чöскыд, а пеж тшаклöн – лёк. Тайö абу сідз. Еджыд понтшакыд да гöрд гут кулан тшакыд абу дукаöсь. Найöс позьö торйöдны сöмын рöм сертиыс. Нöшта на тшакалысьяс чайтöны, мый номыръяс оз сёйны пеж тшактö. Зэв на бура и сёйöны! Öктöй сöмын тiянлы тöдса тшакъяс.

Друг кö ылалiнныд, медводз сувтöй да воöй ас садяд. Корсьöй вылысiн, видлöй звöнитлыны медводз мездысь службаö 112 номер серти. Висьталöй, кытi пыринныд вöрас, мый аддзанныд. Мездысьяс пуктасны став вын, медым петкöдны тiянöс дженьыд туйöд кутшöмкö сикт либö кар дорö. Телефон кö абу, казьтыштöй, кодарсянь пыринныд, мый аддзывлiнныд мунiгад. Отсалас йöз дорö петны ю либö шор. Шорлöн визулыс петкöдас ю дорö. А мунны кö ю берег пöлöныс, быть петанныд кутшöмкö сикт дорö. Отсöгöн вермас лоны и высоковольтнöй линия – сылöн керасыс тшöкыда вайöдö сиктлань жö.

Вöрын кокни паныдавны вöрлудiктö, но мынтöдчыны сыысь сьöкыд.

Тöдöй, вöрлудiкыд, мукöдыс шуöны сiйöс пу тойöн, оз ов пу вылын, а пукалö турунын, улысiнын, ыркыдiнын, туй бокъясын. Сiйö оз радейт жар шондi, тöлаинъяс. Та вöсна вöр-ваын бöрйöй сэтшöм ин, кытчö веськалö шондi, бура тöлöдö.

Медым вöрлудiкыд некытчö эз пысась, колö кизявны куртка, лэдзны сосъяс, гач помъяс сюйны сапöгö, чышъянасьны либö шапкаасьны. Вöрö пыртöдз резышталöй паськöмтö да восьсаинъястö – сьылi да киястö лавкаысь ньöбöм сорасöн.

Ковмысяс кö узьмöдчыны вöрын, узянiнтö вольсалöй коз лыскöн. Лöсьöдöй ин бупур улö сiдзи, медым эз сотчы ставыс гöгöр. Та понда колö весавны бипур гöгöр кос турунысь да нитшкысь. Муыс кö торфа, вевтьöй сiйöс лыаöн. Бипур повзьöдас ном да гут-гаг, а сылöн тшын тыдовтчас ылiсянь.

Биысь видзчысян служба да войтырöс доръян республикаса управлениеысь

шöр специалист Инесса Трусаг