Ярашъюын ворсiсны волейболысь Пожöг овмöдчöмин улö пырысь сикт-грездъясысь айловъяс да аньяс. Ордйысьöмсö сиисны Айму вöсна Ыджыд Тышын вермöмсянь 70 во тырöмлы. Ворсöмсö котыртö овмöдчöминса администрация нёль во дорвыв нин буретш Победа лун водзын. Могыс – ышöдны йöзöс, торйöн нин томуловöс, овны дзоньвидза олöмöн, спорт радейтöмöн, сöвмöдны да паськöдны йöз пöвстын волейболысь ворсöм, кыпöдны ворсысьяслысь сямлун, бöрйыны медвынаясöс.
Таво чукöрмис вель уна котыр. Медводдзаысь на петкöдчисны Ярашъюысь да Пожöгдiнысь нывъяс, накöд вермасисны Пожöгса шöр школаысь гырысь классъясын велöдчысьяс, кодъяс тшöкыда ветлöны ордйысьöмъяс вылö, волiсны нин и Ярашъюö. Айловъяслöн вöлi 5 котыр: Ярашъюысь, Кекурысь, Пожöгдiнысь кык, сiдзжö биысь видзчысян служба да йöзöс доръян управлениелöн Великопольеса юкöнысь уджалысьяслöн котыр. Медiчöт ворсысьлы вöлi 14 арöс, медыджыдыслы – 51, кызвыныс – томулов.

Ордйысьöмсö донъялiсны спорт ордйысьöмъяс котыртысь Куломдiнса шöринысь инструктор А.Г.Мингалев, кодi уджалö Ярашъюса верстьöяскöд, да Пожöгысь челядьлöн да том йöзлöн спорт школаысь тренер В.В.Бугримов.
Медся ыджыд сям петкöдлiсны Ярашъюса зонъяс. Кужöмöн песiсны мач, мудера вуджöдiсны сiйöс паныда ворсысьяслы, гöгöрвоисны да кылiсны ёрта-ёртöс – öти кывйöн, зонъяс бура тöдöны волейболысь ворсан «гусяторъяс». Весиг öтчыдысь эз ворссьыны да лоисны медводдзаöн. Модöн лоины кекурсаяс. Сэтчöс зонъяс зэв жö сюсьöсь да винёлöсь. Бронза медальяс вичмисны биысь видзчысян служба да йöзöс доръян управлениеысь уджалысьяслы. Колö пасйыны, мый кусöдчысьяс тшöкыда пырöдчöны быд сикас ордйысьöмъясö да оз янöдны асьнысö. Ёнöсь, налöн видзöдлас улысь эз пышйы паныда ворсысьяслöн ни öти воськов. Мöд местаöдз налы эз тырмы сöмын душ-мöд «син» (очко). А 4 да 5 местаяс юкисны Пожöгдiнса айловъяс.
Нывъяс костын медся вынаöн лои Пожöгса школаысь велöдчысьяслöн котыр. Найöс туйдiс велöдысьныс В.В.Бугримов. Ыджыд тыш пансис Ярашъю да Пожöгдiн костын 2 да 3 места вöсна. Медводдза ворсöм бöрын (кыкнанныс ворссисны Пожöгса школалы) нывъяс быттьö палялiсны, босьтчисны да петкöдлiсны зэв мича ворсöм, некыдз эз кöсйыны сетчыны öта-мöдныслы. 2:1 тшöтöн вермысьясöн лоины пожöгдiнсаяс. Найö шедöдiсны мöд места. На бöрся вермысьяс радö сувтiсны ярашъюсаяс.
Вермысьяслы вичмисны «Пожöг» овмöдчöминса юралыссянь грамотаяс да медальяс, мукöдлы – аттьöалан письмöяс.
Зэв нимкодь, мый уджалысь арлыда том йöз да верстьöяс пыдди пуктöны спорт, аддзöны сы вылö кад. Ордйысьöм вылö, шуам, мукöдыс локтiсны семьянаныс: гöтырыс ворсiс аньяслöн котырын, верöсыс – айловъяскöд. Öти командаын вöлiны весиг мама-ныла. Ордйысьöм лоö прöст кад зэв бура колляланногöн: и дзоньвидзалун ёнмыштас, и лёкланьö сетчöм вылö кад этшаджык лоö.
Мария МИХАЙЛОВА.